Fermandarê  Hêzê Sûrîyeya Demokratîke (QSD) yê Serêkanîyê Şervan Sasonî derheqê rewşa peyêne ya Qelaya Xoverdayîşê Serêkanîyê de cewap da persanê ma.

Sasonî serê persê mayo ke artêşa pîle ya diyîne yê NATO pêroyê çeteyanê xo 10 rojan ra nata şer keno, gelo roja 10’ine de rewşa şerî senîn a, vat ke, “No şerê 10 rojêne newe nîyo, hewt serre ra nata Serêkanîyê rê hêriş kenê. No şerê 10 rojêne netîceyê ferasete 100 serran o. Ma verba ferasetî şer kenê.Hêrişan 10 roje verê cû dest pêkerd. Pêroyê şervananê ma amadekarîya xo kerdibi. Hêrişan bi çekanê giranan û hêrişanê hewayî reyde dest pêkerd. Ma tedbîrê xo yê pîî mabênê şaristanî de girewtî. Seba ke artêşa îşxalkare nêkewe şaristanan, şervananê YPG-YPJ û QSD’yî dormeyê xo de tedbîrê pîtî girewtî. Dişmenî roja diyîne waşt ke serê erdo vengî de dorme bigêre la no hêsan nêbi. Heta ke dormeyê şaristanî ameyî girewtene bi seyan leşkeri û çeteyi ameyî kiştene. Bi desan tank, panzer û wesayîtê dişmenî ameyî îmhakerdene. Dima ke dormeyê şaristanî girewt, waşt ke debikewê şaristan. Panc rojanê verênan de netîceyêk nêkewto deste dişmenan. Bi obüs û tankan bombardûmanî kerdî. Bi seyan leşker û çeteye înan merdî, la ser nêkewtî.

Herêma Sanayî ya hetê rojakewtena şaristanî panc reyan dest vurnaye. Nêeşkayê deste şervananê ma ra bigêrê. Bi çekanê giranan sanayî bombardûman kerde û wina dest na ser. Nika zî rewşa şaristanî no yo, her ca de teyarayî bombardûman kenî. Pêroyê şervanê QSD’yî fedaîyê şarî yê. Her şervanê ma yê nê çeperan de fedaî yo. Şervanê ma verba pêroyê nê tehlûkeyan de şer kenê, erd û şarê xo pawenê.”

Serê perse mayo ke Serêkanîyê senî bîya qelaya xoverdayîşî, Sasonî vat: “Qerarêkê ma esto, ganî erde ma nêkeweo deste dişmenî. Cayê ke dişmenî girewtî, ma nînan apey bigêrê. Na qelaya xoverdayîşî ya. Serêkanîyê de çeperêk nêşikîyo. Kam yew çeper derb werde, heyfê xo girewt. Serêkanîyê de cinî, camêrd û pêroyê keyeyî QSD’yî reyde verba çeteyan şer kenê. Adirbirnayîş sey vatiş mend, pratik de nêame caardene. Dewleta Tirkî adirbirnayîş binpay kena. Hêrişî hema zî dewam kenê. Wextê adirbirnayîşo fermî ame parekerdene ra heta nika 40 çeperanê ma rê hêrişî ameyî kerdene û ma pêroyê hêrişî şikitî. Zafê caran hêrişê nêweşxaneyan kerd. Nêweşxaneyan de zafê birîndarî estî. Şervanê QSD’yî verê hêrişî girewtî. Ganî naye bêra zanayene ke dewleta Tirkî nêeşkena metreyêk zî wetêr şore. Senî ke şervanê QSD’yî seba 5 metre xo ver dane û mirenê, kewenê çeperan, ganî her kes sey înan tê bigêro. Vengdayîşê ma pêroyê Kurdistanijan rê no yo. Ganî verba dişmenî ma bibê yew.”

Sasonî peyêne de pare kerd ke ê nêeşkenî xeberanê neweyan ê cîhanî baş taqîb bikê û vat ke, “Ez bawe keno ke komelî bi wijdan ê û na rewşe vînenê. Tîya komelêk yeno qetilkerdene û çinkerdene.”