Tamara Garabet Sarkîse cinîyêka ke mîyanê tabûrê destpekî yê Armenîyan de ya. Tamara 33 serre ya û dadîya 8 domanan a. Naye ra ber zî tewrê hêzanê pawitişî yê Rojawanî bîye. Tamara destpêkê YXK'yî zî biye, dima tewrê YPG-YPJ'yî û QSD'yî bîye, niak zî Tabûrê Şehîd Nûbar Ozanyanî de ya ke serra 2019 de saz bîyo.

Serra 2012 de wexto ke çeteyê Cephet El Nûsra û DAÎŞ'î bi hetkarîya Tirkîya sînorî ra derbas bîyî û hêrişê Serêkanîyê kerd, Tamara hetê YPG'yî de bîye û wezîfeyê xo yê pawitişî ard ca. Tamara tewrê xoverdayîşê verba hêrişkarîya dewleta Tirkî bîye ke 9'ê Teşrîna Verêne de Serêkanîyê de newe ra dest pêkerd û neçar menda ke embaza xo ya birîndare reyde cepheyî ra dûr bikewe. Tamara nika sivîlan ra hetkarîye kena û dormeyê xo seba seba xoverdayîşî amade kena. Şaranê dinya ra û cinîyanê Armenîyan rê veng dana ke verba hêrişê dewleta Tirkîya seba şarê Sûrîye wurzê payan ser.

Tamara ANF'yî rê qisey kerd û vat: "Serra 2011 de amadekarîya Şorişê Rojawanî dest pêkerd. Ez cinîyêka Armenî ya û o çax tewrê amadekîya Şorişê Rojawanî bîya. Ez zewijnaye ya û 8 domanê mi estî. Wexto ke şer dest pêkerd nêçar menda ke domananê xo keye de biverde û seba pawitişê şarî dest bierze çek. Ez wextêk tewrê YPG-YPJ'yî bîya. Dima embazanê YPG'yî ra  vat, ê wazenê Taburêkê Armenîyan saz bike û ez zî tewrê ucayî biba. Ez şa bîye ke seba pawitişê şarê ma hêzê pawitişî amayêne sazkerdene. Tabûrê ma derheqê kultur û hunerê Armenîyan de zî xebitîyo. Labelê senî ke dişmenî 1915 de 1.5 Armenîyî qetil kerd, bi nê hewayî  reyna hêrişê a kerd. Ma zî tewrê pawitişê Serêkanîyê bîyî.

Dewleta Tirkî reyna hêrişê Ereb, Kurd, Armenîyan kerd. Ma zî neçar mendî ke Serêkanîyê ra bivejîyê. Artêşa Erdoganî ertêşêka gemarine, bêexlaqe û bêwijdanî ya ke cînîye, doman, kalpîr her kes qetil kena. Ma do artêşa Erdoganî çin bikê. Erdogan bi çekanê kîmyewî hêriş keno. Gelo çira dewletê dinya bêveng manenê? Binê çekanê kimyewî de qêrayîşê domananê ma berz beno, bedenê înan bi çekanê kîmyewî yenê vêşnayene.

Seba ke ma erdê xo, domananê xo û cuya xo pawenê Tirkîya ma rê vana terorîst û dinya verba naye çîyêk nêkeno.  Heqê ma çin ê gelo? Heqê merdimî yê ke dinya behsa ci kena ça de yê? Gelo seba ke ma rayîro rast de yê û bi hewayêkê têdûştî ciwîyayenê heqê ma çin ê? Ez veng dana şarê dinya ke Ma do ser bikewê. Ma do nêbê çin. Ma sey Kurd, Ereb, Armenî û Sûryanî wazenê Sûrîyeya demokratîke de biciwîyê. Ma Tirkan nêwazenê. Hêrişê dewleta Tirkî de ame çimê mi ver ke serra 1915 de keyeyê mi û Armenîyî senî destê dewleta Tirkî de ameyî qetilkerdene. Ez şaranê dinya rê û cinîyanê Armenîyan rê û Armenîyan rê vana ke seba şarê Rojawanî wurzê payan ser û ma  nê hêriş û qirkerdişanê dewleta Tirkî vindarnê."