Şingalî bi xoverdayîşî dest pê serra newîye kerd
Xoverdayîşê şarê Şingalî yê seba wayîrvejîyayîşê Asayîşê Êzidxanî û vera peymana Bexdad-Hewlêrî ya serê Şingalî bi şîarê ''Ma pêro Asayîş ê'' roja yewîne ya serra newîye de dewam keno.
Şingalî bi xoverdayîşî dest pê serra newîye kerd.
Roniştoxê Şingalî vera peymana PDK-Iraqî ya serê Şingalî pîya wayîrê Asayîşê Êzidxanî û hêzanê xo yê pawitişî vejîyenê. Şingalijî 31 rojan ra nata verê Asayîşê Êzidxanî de xeyme de bi şîarê 'Ma pêro asayîş ê' çalakîya nobete kenê.
Qeza û bajarekanê Şingalî ra her roje xeylêk kesî û temsîlkarê meclîs û dezgehê Şingalî xeyma çalakîye zîyaret kenê û tewrê çalakîye benê.
Şarê Şingalî wazeno ke Asayîşê Êzidxanî û xoserîya Şingalî bi hawayêkê fermî bişinasîyê.
