Ajansê Anatolia (AA) ya ke ajanso fermî yê dewleta tirke yo, îtîraf kerd ke îstîxbaratê tirkî (MÎT) xîret keno ke endamanê DAÎŞî yê ke Rojawan de tepişte yê bixelisnê.

AA ewro xeberêka  bi sernameyê ''MÎTî cinîyêka molovayîje û 4 domanî destê YPG7PKKyî ra xelisnayî'' weşanaye. Xebere de îtîraf kerd ke nê kesî Kampa Holî ra ameyî remnayene  ke kampe de DAÎŞijî estê.

Xebere de yeno vatene ke MÎTî pê xîretêkê pîlî nê kesî 6ê hezîrane de Kampa Holî ra remnayî Girê Sipî û uja ra zî derbazê Tirkîya kerdî. Xebere de cnîyêka moldovayîje bi nameye Natalia Barkal dewleta tirke rê sipas kena. Bi nê hawayî reyna têkilîya mabênê DAÎŞ û dewleta tirke eşkera bîye.

Balkêş o ke xebere de yeno vatene ke MÎTî operasyonê waştişê hukmatê Moldova ser o kerd. Îdareyê Xoserî verê cû zî tim ardêne ziwan ke welatê ke Rojawan de hemwelatîyê înan ê DAÎŞijî estê, wa bêrê û hemwelatîyanê xo berê. La balkêş o ke Hukmatê Moldova seba naye MÎTî ra hetkarîye waşte. Goreyê xebera AA Serekkomarê Moldova Igor Dodonî zî fotografê na cinîye û 4 domanî medyaya komelkîye de pare kerdî.

Dewleta tirke wexto ke Girê Sipî û Serêkanîye îşxal kerdî hêverî xîret kerd ke DAÎŞijan bixelisna.