Dezgehê Îstîxbaratî yê Tirkan (MÎT) Rojawanê Kurdîstanî de vera xoverdayîşê şarî û seba metodanê şerê taybetî xeylêk kar keno.

Mesuldar û ajananê MÎTî yê ke 2021 de operasyonanê Hêzanê Asayîşê Zereyî de tepişîyayî, sûcê xo îtîraf kerdî û pare kerd ke ê seba têmîyankerdişê herême û suîkastan ameyê wezîfedarkerdene.

ANFyî îtîrafê mesuldarê herêmî yê MÎTî Ramî Samî Abdalî û ajananê MÎTî Davû Baas Al Wadî, Hasan Alî Yûnûs, Huseyîn Alî Yûnûs û Leys Enes Al Medfeyî vistî destî ke nê kesan Dirbêsîyê û Reqa de ajanîye kerdêne.

Ramî Samî Abdal şaristanê Serêkanîyê yê Rojawanî ra yo û wextêk zî dezgehanê QSDyî de xebitîya. Abdalî hêrişanê vera Serêkanîyê ra dima koçê Dirbêsîyê kerd û ucade bi ajanê MÎTî. Abdalî vat: ''Mi tay dîmenî girewtêne û Eneso ke ez kerda mîyanê MÎTî rê şawitêne. Ey zî bedelê ney de 150 hezar lîraya Sûrîye (qasê 50 dolar) şawitêne mi. Enesî wextêk mi ra waşt ke ez endamê QSDyî yê bi nameyê Abdoyî bikişa. Enesî ra dima Ebû Celûdî mi ra waşt ke kesê bi nameyê Hamûde Hamzayî de têkilîye viraza. Hamûdeyî mi ra waşt ke wesayîtêkê sivîlî de bomba debikera. Endamanê Artêşa Milî ya Sûrîye (OSO) pê madeyanê kundoxî ez kerda ajan.''

Dawûd Baas Al Wadîyo ke Dirbêsiyê ra yo pê rayîrê Ramî Samî Abdalî bîyo ajan. Al Wadîyî vat: ''Ez û Ramî ma pîya dîmenê dezgehanê leşkerîyan girewtêne û şawitêne cergan. Ramîyî seba nê karî 150 hezar lîraya Sûrîye da mi. Ez zaf poşman a.''

Leys Enes Al Medfeyo ke Reqa ra yo seba kaos vetişî ameyo wezîfedakerdene. Leys Enesî vat: ''Messengerî ra kesê bi nameyê Huseyîn Alî Yunusî mi de têkilîye viraşte û waşt ke ez borşuran amade bikera ke propagandaya OSOyî kenê û dimenanê tay şaristanan bişawa. Dima kesê bi nameyê Umran Halef Al Casimî mi de têkilîye viraşt ke o nika Tirkîya de yo. Mi tay dîmenê Reqa înan rê şawitî. Înan dîmen û broşurê ke mi şawitbî facebook de weşanayî.''

Huseyîn Alî Yunuso ke Reqa ra yo Umran Halef o kerdo ajan û vat: ''Ez messengar de Umran û Leys Enesî reyde tewrê komêka sohbetî bîya. Mi ra ame waştene ke ez medyaya dîjîtale de broşuranê OSOyî vila bikera. Dima înan mi ra sewbîna karî zî waştî.''

Hasan Alî Yunus zî birayê xwe Huseyîn Alî Yunusî reyde seba MÎTî xebitîyayo. Hasan Alîyî vat: ''Umranî rojêke mi rê fotografê borşurê îstîxbaratê tirkî şawitî. Ey mi ra waşt ke ez tay dimenan bişawa ey. Mi zî şawit. Ez ajanîya MÎTî ra poşman a. Dewleta tirke ma xapînayî.''