Endamê Konseya Hemserekîye ya PYDyî Aldar Xelîlî serrgêra îşxalê vera Efrînî de ANFyî rê qisey kerd.

Xelîlî vat: ''Heyf ke îşxalê Efrînî 4 serrî xo pey de verdayî û hema zî Efrîn nêame xelisnayene. Efrîn birîna ma ya ke her tim rojdemê ma de ya. Seba xelisnayîşê Efrînî ma tim xebitîyenê, xo rêxistin kenê. Dişemn Efrîn, Serêkanîyê, Girê Sipî, Îdlîb, Cerablus, Ezaz û Bab û xeylêk herêmê Sûrîye îşxal kerdî. Eke firsend bivîno herêmanê bînan zî îşxal keno. ''

Derheqê serebûtanê ke Efrîn de qewimîyenê de Xelîlî wina qisey kerd:

''Nê herêmanê îşxalkerdeyan de arman û xîrey no yo ke şarê kurdî û kulturo demokratîk bêrê çinkerdene. Herêmê îşxalkerdeyî vurîyayî qerargehanê merkezîyan ê perwerdeyê cergan û vilabîyayîşê înan ê ver bi dinya. Nê herêman de barbarîye esta. Seba çinkerdişê kulturê şarê ma, vurnayîşê demografîkî û nasmeyî polîtîkaya îmhakerdişî yena rayberdene.''

Xelîlî da zanayene ke şarê Efrînî rixmê nê çîyan zî xo ver dano û vat: ''Şarê ma şaristananê îşxalkerdeyan ra dûrî nêkewt. Şarê Efrînî, Serêkanîyê û Girê Sipî 4 serrî yo Heleb û Şehba de binê şertanê giranan de yo. Şar pabeyê azadkerdişî yo coka bi nê ruhê xoverdayîşî têgêreno. Şar xo keno hêzê azadkerdişî. Ganî her kes bi nê ruhî têbigêro. Ma erkanê tarîxîyan de têrî yê. Heta ke ma nê herêman azad nêkerê nêeşkenê qala destkewteyanê şorişî bikerê.''

Aldar Xelîlî derheqê rewşa peyêne ya têkilîyanê Rojawanî yê bi Şamî de wina qisey kerd: ''Meseleya Sûrîye û Rojawanî ganî pê dîyalogan çareser biba. La rejîmî seba ney gamêka cidîye nêeşte. Rejîmê Şamî tim ma rê gefan waneno. Ma wazenê Şamî reyde dîyalogî bidê destpêkerdenei seba ney ma xîret zî kerd.. Ma eşkenê pîya meseleyan çareser bikerê û Sûrîyeya demokratîke awan bikerê. Heta ke netîceyêke bivisnê destî ma do xîretanê xo rê dewam bikerê.''