Endamê Heyetê Rayberdişî yê Hemserekîya PYDyî Aldar Xelîlî derheqê qewimîyayîşanê Sûrîye yê peyênan de cewab da persanê ma.

Xelîlî bale ante ser ke rejîmê Baasî rijîyayo la oyo girîng no yo ke ganî herinda ci de rejîmêko demokratîk bêro ronayene. Xelîlî vat: ''Ganî rejîmo newe şarêkî ney pêro şaran bigêro mîyanê xo. Ma 2011 ra nata tim heman ercnayîşî kerdî. Ma tim vatêne ke no rejîmo tûj wa bêro wedaritene.

Hetê bînî ra rîyê mudaxeleyanê dewleta tirke ra krîzê Sûrîye heta nê çaxî nêame çareserkerdene. Heta ke nê krîzî de mesuldarîya Sûrîye nêra dîyene krîzê Sûrîye do nêqedo. Kurdan xora cara 61 serran rejîmê Baasî ra ant. La mudaxeleyê Tirkîya zî sey rejîmê Baasî tehlukeyîn ê. Dewleta tirke vana ke herêmanê kurdan de wa kurdî nêmanê, Sûrîyeya demokratîke nêra ronayene. 

Tirkîya wazena projeyê demokratîkî yê Rojawanî (Îdareyê Xoserî) werte ra wedarna. Xora eke derdê înan demokrasî bîyêne do Îdareyê Xoserî de dîyalogî bikerdêne. Nê prosesî de ganî îradeyê pêro şaranê Îdareyê Xoserî bêro esaskerdene. û hêrişê vera Îdareyê Xoserî biqedê.

Projeyê Îdareyê Xoserî eşkeno pêro şaran bigêro mîyanê xo. Ewro pêro şarî binê sîwana Îdareyê Xoserî de ciwîyenê û nînan pîya vera DAÎŞî xo ver dabî. Dewleta tirke hema zî bi giranî hêrişê Îdareyê Xoserî kena. Hêrişê nikayênî yê vera Minbicî bi destekê dewleta tirke yenê kerdene. 

Ma projeyê Îdareyê Xoserî de israr kenê. Ganî Tirkîya mudaxeleyê meseleyanê zereyî yê Sûrîye nêkera û şarê Sûrîye bi xo qederê xo tayîn bikerê. Projeyê Îdareyê Xoserî garantîya qedîyayîşê krîzan a. 

Na hele zî vera Minbicî hêrişê pîlî est ê. Meclîsê Leşkerî yê Minbicî şerwananê xo de xo ver dano û hêrişan şikneno. Eke nê hêrişî nêrê şiknayene xora dewleta tirke do nêvindera. Ganî pêro kesî cepheyê xoverdayîşî yê Minbicî de cabigêrê. Hetê bînî ra Dêra Zorê de zî hêrişê DAÎŞî dewam kenê. Yanî heta ke dewleta tirke est ba hêrişî do est bê. 

Şarê ma yo ke hêrişanê dewleta tirke ra Şehba ra koç keno, Tebqa, Reqa û cayanê bînan de yeno cakerdene. Ma seba şarê xo yê koçberî bi fedakarî şer kenê. 

Rijîyayîşê Baasî ra dima ganî rejîmêko newe bêro ronayene. Ganî îdareyo newe pêro şaranê Sûrîye temsîl bikero. Eke komê çekdarî ancî bikewê pê krîzê Sûrîye do giranêr bibo. Ganî bêro qebulkerdene ke projeyê Îdareyê Xoserî projeyo nimûne yo.

MSD ewro eşkeno muxalefetê Sûrîye binê yew sîwanî de bîyaro yew ca, QSD eşkeno bino hêzêkê Sûrîye yê leşkerîyî û projeyê Îdareyê Xoserî zî eşkeno bibo projeyê ameyoxê Sûrîye. Îdareyo Xoser bi pêro sîstem û komelê xo seba çareserîye amade yo. 

Şarê ma ganî bê teredut û bêmabênî destkewteyanê xo bipawê û mîyanê xoverdayîşî de cabigêrê.''