Endamê Konseya Hemserekîye ya PYDyî Aldar Xelîlî ANFyî rê qisey kerd.

Aldar Xelîlî bale ante tecrîdê vera Rayberê Şarê Kurdî Abdullah Ocalanî ser û vat: ''Armancê Komployê Mîyanneteweyî astengkerdişê felsefe û îdeolojîya Rayber Apoyî bi. Bi taybetî 2015 ra dima tecrîd zaf ame girankerdene. Çunke ame dîyene ke pêvînayîşê bi Rayber Apoyî ra dima fikrê ey ê serê projeyê demokratîk-azadîye aver şinê.  Hetê bînî ra dewleta tirke serranê peyênen de zaf derbê giranî werdê. Projeyê Rojawanî zî projeyê Rayber Apoyî yo. Dewleta tirke bi rayîrê tecrîdî qesas gêna. Tecrîd sûcê vera merdimîye yo û nêno qebulkerdene. Ganî merdimî, pawitoxê heqanê merdiman û pêro kesî vera ney wurzê payan ser.''

Aldar Xelîlî wina suîkastê vera Ferhad Şiblîyî ercna: ''Dewleta tirke kam xizmetê şarê kurdî bikero hêrişê ci kena. Kesê ke seba Îdareyê Xoserî zî xebitîyenê dewleta tirke înan xo rê kena dişmen.''

Xelîlî îfade kerd ke PDK zî a raşte mîyanê Koalîsyonê AKP-MHPyî de ca gêno û vat: ''PDK projeyanê AKP-MHPyî ano ca ke nê projeyî dişmenîya şarê kurdî û têgêrayîşê azadîye kenê.''

Xelîlî vist vîrî ke Wezîrê Karanê Zereyî Suleyman Soylu şîyo Girê Sipî û vat: ''Dewleta tirke Cerablûs, Ezaz, Bab, Efrîn, Serêkaniyê û Girê Spî îşxal kerdî. Îdlîbî ra heta Serêkanîyê cergî est ê. Verî zî selahîyetdarê Tirkîya ameybî nê cayan. Nê kesî bi nê hawayî vanê 'Tîya erdê Tirkîya yo.' Xora Rojawan de şer dewam keno. Ê xîret kenê ke şerî giranêr bikerê û herêmanê bînan zî îşxal bikera. Nika zî amadekarîya îşxalî est a. Verî zî ma vera îşxalî xo ver da. Şarê ma zî paştî daye nê xoverdayîşî. Hînî tecrubeyê şarî zî zêdîyayî. Eke dewleta tirke reyna hêriş bikera do derbanê pîlan biwera û ma zî bi nê firsendî herêmanê îşxalkerdeyan bixelisna.''

Aldar Xelîlî derheqê têkilîyanê mabênê Rojawan û Şamî de vat: ''Tewirê rejîmê Sûrîye de tay vurîyayîşê pozîtîfî est ê. Înan verî vera îşxalî tewirêk nêmojnayêne. Aseno ke vera îşxalî ê wayîrê tewirêkî yê. Do tay gamê pozîtîfî bêrê eştene.''

Aldar Xelîlî  hêrişê muxtemelî yê dewleta tirke ser o tewirê hêzanê garantoran Amerîka û Rûsya wina ercna: ''Hêzê mîyanneteweyî herême de wayîrê plan û projeyanê cîyayan ê. Ma do bivînê ke tewirê înan senî bibo. Ma xora paştîya xo nêdanê tewirê înan. Heta nika înan vera dewleta tirke tewirêko zixm nêgirewt. Eke şer biqewimîyo ma do xoverdayîşêkê pîlî bikerê. Ma do bi xo pawitişê xo bikerê.''