Rojawan de avûkatê ke endamê “Înîsîtayîfê Rayber Abdullah Ocalanî Bipawê”  û “Înîsîyatîfê Rayber Abdullah Ocalanî rê Azadîye”  yê semedê şîyayîşê Îmraliyî muracatê Neteweyanê Yewbîyayeyan (NY) kerd.

Endamê wird înîsîyatîfan Qamişlo û Kobanê de eşkerayîya çapemenîye daye û bale ante sîstemê tecrîdê giranî yê Îmraliyî ser.

Qamişlo de eşkerayîye verê Ofîsê Komîserîya Berze ya Multecîyan a NYyî de ameye kerdene. Eşkerayîye de ame vîrvistene ke tecrîdê Îmraliyî di serranê peyênan de giranêr bîyo û nê ameyî vatene:

''Mektubê ke yenê şawitene, cezayê dîsîplînî yê dewleta tirke mojnenê ke cuya Rayberîye binê tehlukeyî de ya.  Dewleta tirke bi her qeyde rayîr û metodan peyê îmha de ya.  Sergêra seyêne ya Lozanî de şexsê Rayberîye de dewaya kurdan yena hedefgirewtene. Gerek CPT û dezgehê mîyanneteweyî yê eleqedarî vera nê vengê xo berz bikerê. Ma tîya ra reyna danê eşnawitene ke ma semedê Rayber Abdullah Ocalanî qerqilîyenê. Coka semedê vînayîşê Rayberîye ma waştişê xo newe kenê.  Ma do semedê Rayberîya xo têkoşînê xo bidomnê. Ma veng danê rayapêroyîya dinya ke semedê wedaritişê tecrîdî wa şirê Tirkîya ser.''

Avûkatan badê eşkerayîye waştişê şîyayîşê Îmraliyî û metno ke şertê Îmraliyî tede ca genê teslîmê selahîyetdaranê Komeserîya Multecîyan a NYyî kerd.

 Wird înîsîyatîfan eynî eşkerayîye bajarê Kobanê de zî daye. Eşkerayîya ke Meydanê Şehîd Egîdî de ameye dayene, semedê hîsgêrîye ame vengdayene.