Hemserekê Dayîreyê Têkilîyanê Teberî yê Îdareyê Xoserî Abdulkerîm Omerî babeta muhakemekerdişî û teslîmgirewtişê DAÎŞijan de ANFyî rê qisey kerd.

Omerî da zanayene ke herême de tehlukeyê DAÎŞî dewam keno û vat: ''DAÎŞ hetê leşkerî ra ame qedînayene la herême ser o tesîrê fikrê DAÎŞî esto. Meseleya DAÎŞî pê çareserîya şerê zereyî yê Sûrîye qedîyena. Rojawan de operasyonê vera DAÎŞî dewam kenê la dewleta tirke hema zî pê destê cergan hetkarîye dana DAÎŞî. Qefilîyayîşê Berê Sînorî yê Til Koçerî, qanûnê Sezarî û polîtîkayê winasênî benê sebeb ke herême de rewşe xirabêr biba. DAÎŞ ney sey firsend vîneno û herême de têgêreno.''

Omerî derheqê muhakemekerdişê endamanê DAÎŞî de wina vat: ''Zîndananê Îdareyê Xoserî de bi hezaran endamê DAÎŞî estê. ma waşt ke seba muhakemekerdişê nê cergan mehkemeyêke bêra ronayene û waro mîyanneteweyî hetkarîya ma bikero. La paştdayîşo qîm nêdîyeno ma. Ma domananê sivîlan teslîm kenê çunke ê sey ameyoxê DAÎŞî ameyêne amadekerdene. Cinîyê ke sûcê înan îsbat bîyê ma nînan teslîmê dewletanê ci nêkenê. Tewr peyên ma tay cinîyî teslîmê Ozbekîstanî kerdî. Hema destê Îdareyê Xoserî de zaf tepişteyî estê ke no zî bara ma keno giranêr. Ozbekîstan, Arabîstana Suûdî û tay welatê Ewropa beşêkê hemwelatîyanê xo berd. Rayaumûmîya mîyanneteweyî na babete de wezîfeyê xo nêana ca.''

Omerî pare kerd ke înan verî tay welatê Ewropa zîyaret kerdî la seba ke statuyê Îdareyê Xoserî nêşinasîyeno meseleyî qewimîyenî. Omerî vat: ''Ganî endamê DAÎŞî goreyê qanûnanê mîyanneteweyîyan bêrê muhakemekerdene. Tay dewletî naye qebul kenê, tayê ci zî hema zî nîqaş kenê. Ganî cade bira na mesele bêra dayene.''