Baxoz de mabênê şerwananê QSD'yî û çeteyanê DAÎŞ'î de şerêko giran qewemîya. Selahîyetdarê Buroyê Merkezê Çapemenîye yê QSD'yî Mustefa Balîyî ANF’yî ra vat, înan hîrê hetan ra dormeyê çeteyan girewto û êdî kewtê merheleya peyên a operasyonî.
Operasyonê şerwananê Hêzê Sûrîyeya Demokratîke (QSD) yê dewa Baxozî ya qezaya Hecînî ya Dêra Zorî êdî merheleya peyêne de yo.Tay mendo ke cayê peyên ê destê çeteyanê DAÎŞ'î zî bêrê xelisnayene.
Selahîyetdarê Buroyê Merkezê Çapemenîye yê QSD'yî Mustefa Balî serê rewşa peyên a operasyonî de ANF’yî rê qisey kerd û ard ziwan ke, çeteyî cayêkê qijî de tengasîye de mendê. Hîrê hetan ra dormeyê çeteyan ameyo girewtene û vat, “Yan ê do teslîmê şerwananê ma bibê, yan zî ê do bêrê kiştene. Rayîrêko bîn êdî verê înan de nêmend.”
Balî ard ziwan, operasyon do naye ra dima bi pakkerdişê wareyan dewam bikero û vat, “Seba ke cayêko qij mend, eke teslîm nêbê ê do bi temamî îmha bibê.”
Operasyonê Baxozî de şerwananê QSD'yî heta nika nêzdîyê 17 hezar sîvîlî herême ra vetî. Dimayo ke sîvîlî herêmanê biasayîşan de ameyî cakerdene, şerêkê giranî dest pê kerd û hîrê rojî yo ke bê mabên dewam keno. Ame vatene ke heta nika bi desan çeteyî ameyî kiştene.
