Operasyonê Hêzanê Sûrîyeya Demokratîke (QSD) yê dewa Baxozê yê bajarekê Hecînî yê Dêra Zorî dewam keno.

Operasyonê şerwananê QSD’yî yo ke 1’ê Adare de dest pêkerd, 3 perran ra dewam keno. Seba ê DAÎŞ’îyê ke teslîmbîyayîş qebûl kerdê û keyeyê înan wareyê şerî ra bêrê dûrfînayene, perrêkê operasyonî ame vindarnayene. Mîyanê di rojan de bi hezaran DAÎŞ’îyî û keyeyê înan teslîmê şerwananê QSD’yî bîyî.

Labelê xeylî çeteyê ke qebûl nêkerdî teslîm bibê, bi sûyîqestan, bi fuzeyan û wesayîtanê bombabarkerdeyan kenê ke vernîya averşîyayîşê şerwananê QSD’yî bigêrê.   

Perrê rojakewtene yê operasyonî seba hewilnayîşî ame vindarnayene û korîdorê hewilnayîşî ame akerdene. Perranê vakûr û başûrê rojakewtene de zî operasyon de şerêko çetin dewam keno.

Kameramananê ANF’yî cepheyanê vernîyan ê perrê vakûrî yê operasyonî de dîmenê şerê çetinî girewtî.

Operasyonê hewilnayîşê sivîlan, keyeyanê DAÎŞ’îyan û DAÎŞ’îyê ke teslîmê QSD’yî bîyê 9’ê Sibate de dest pêkerdîbî. Hewilnayîşî de ke heta 1’ê Adare dewam kerd, 10 hezarî ra vêşêr kesî herêmanê biasayîşan de ameyî bicakerdene.

Xebata hewilnayîşî yê 20 rojan de nêzdîyê 2 hezar çeteyê DAÎŞ’î yê xerîbî û keyeyê înan zî tede bi hezaran kesî ameyî hewilnayene. Hêzanê QSD’yî qedîyayîşê prosesê hewilnayîşî ra dima, 1’ê Adare saet 18:00 de dest bi operasyonê hemverê çeteyanê ke Baxoz de mendê kerd.