Cenazaya Fermandara YPJyî Mizgîne Kobanêya (Sîhame Muslim) ke 2ê temmuza 2022yî de netîceya hêrişê droneyê çekdarî yê dewleta tirke de şehîd bibî, Kobanê de bi merasîmêkê girseyî ameye definkerdene. Xeylêk hemwelatîyî tewrê merasîmî bîyî. Merasîm de fotografê Mizgîne Kobanê û alayê YPJyî ameyî akerdene.

Goristanê Şehîde Dîcle de verî Îdarekarê Meclîsê Leşkerî yê Girê Sipî Rîyad Xelefî qisey kerd û  îfade kerd ke ê do qetî herêmanê îşxalkerdeyan bixelisnê.

Dima Hemsereka Heyetê Zereyî yê Herêma Firatî Sozdar Şêxoyî heqê qiseykerdişî girewt û vat: ''Dewleta tirke tim bi hêrişan cinîyan kena hedef çunke cinîyan ra tersena. Ma do tim wayîrê şehîdanê xo vejîyê û apey gamêke nêerzê.''

Nameyê keyeyê Şehîde Mizgîne ser o Hebûne Mihemed qisey kerd û vat: ''Wext wextê şerê şarî yê şorişgêrî yo. Ma do heta azadîye de têkoşînê xo xurtêr bikerê.''

Dima cenazaya bi sloganê 'Şehîdî Nêmirenî' ameye definkerdene.