Zîne Doga (Nûre Silêman) Qamişlo de dadîya xo ra bena û keyeyê xo yê welatperwerî ra PKK şinasnena. 2015 de wextê hêrişanê cerganê DAÎŞî de Zîne Doga tewra refanê YPJyî bena. Dima  vera raştîya tarîxî ya ke cinîyan rê yena ferzkerdene, hêrs bena û verê xo dana koyanê Kurdîstanî.

Zîna ke Rojawan de karê çapemenîye kerdêne, sey gerîla koyan de bi kelecanî têgêrena. A 2020 de mîyanê Hêzanê Taybetan de cagêna û dima embazanê xo rê serkêşîye kena. Zîne Doga heta nefesê xo yê peyênî vera hêrişanê îşxalî şer kena û 29ê gulana 2022yî de bena şehîd.

Babîyê Zîne Hisên Silêmanî derheqê têkoşînê kênaya xo de qisey kerd û pare kerd ke Zîne merdimêka hîsgere bîya. Babî Hisên Silêmanî vat: ''A tek kênaya ma bîye. Zîne seba şarê xo ganê xo feda kerd. Dişmen pê çekanê kîmyewîyan hêrişê domananê ma keno la dinya vera ney bêveng a. Heta ke kurdî yew nêbê nêeşkenê ser bikewê. Ma do heta çilka xo ya peyêne têkoşîn bikerê. Ne gonîya Zîne ne zî gonîya şehîdanê ma yê bînan bîlasebeb nêşîya.''

Dadîya Zîne Resmîya Mihemed îfade kerd ke Zîne aye rê tim bîya embazêke û vat: ''Zîne domanêka cîya bîye.  A bi sereyê xo sey komelêkî bîye. Ez û a ma tim pîya têgêrayêne. Zîne tim meraq kerdêne, pers kerdêne. A domanêka bihûrmete bîye. Zîne 2015 de tewra YPJyî bîye. A roje merasîmê şehîdan est bi. Merasîmî ra dima ez gêraya ci la mi nêdî. Dima aye mi rê telefon kerd û vat ke tewra YPJyî bîya. Mesuldarîya min a ke ez zî rêçê aye ser de şora.''