Endamê Komîteya Merkezî ya Partîya Pêşverû Ferhad Derwêşo ke ANFyî rê hêrişê vera Rojawanî  ercnayî vat ma bi yewîya neteweyîye ya kurdan eşkenê hêrişê îşxalî yê dewleta tirke û çeteyanê ci vindarnê.

Derwêşî vist vîrî ke înan verî zî seba yewbîyayîşê rêxistinanê kurdan veng dayo  û vat: ‘‘ Dewleta tirke tarîxê xo ra vera kurdan polîtîkaya çînkerdişî  rayra bena. Erdogan xo sey sultanêk vîneno. Plankerde hêrişê Rojawanî keno. Hêrişê dewleta tirke îşxal o. Ma no verî Efrîn û dima zî Girê Sipî û Serêkanîyê de dî. Dewleta tirke herême talan kena şarî qetil kena.  Wazenê ke demokrafîyê herême bibedilnê. Coka ma sey şarê herême nêzanê ke siba ma çi paweno.  Erdogan wazeno ke  Rojawanî îşxal bikero. Dima zî Başûrê Kurdîstanî, Şengal, Başîka û Musulî îşxal bikero. No planê dewleta osmanîyan o kahan o. Erdogan wazeno ke nê planî bîyaro ca.‘‘

Derwêşî bale ante xoverdayîşê şerwananê QSD, YPG, YPJyî û hêzanê asayîşî ser û vat: ‘‘ Nê şerwanê ke şar û erdê xo pawenê qijê şarî yê. Bi xoverdayîşêkê xurtî hêrişê çeteyanê DAÎŞî û çeteyanê bînan şikitî û vera înan ser kewtî. Ma zî bi serkewtişî resayî huzur la dewleta tirke nêverda. Na rey zî ê hêriş kenê. Erdogan şarê herême qetil keno bizor erdê înan ra vejeno û şaranê bînan tede ca keno. Erdogan vano ma herême azad kerde. Kamî ra azad keno. Xora şarê herême uca bi. Şarê Girê Sipî û Serêkanîyê erdê xo de ciwîyayêne. Hêriş kerd ê erdê ci ra kerdî nika zî vano ma herême xelisna.‘‘

Derwêşî wina dewam kerd: ‘‘ Tehlukeyo ke gird esto. Ganî ma naye hînî vînî û planê Erdoganî yê vera Rojawanî bêrê pûçvetene. Seba naye zî yewîya neteweyîye ya kurdan hewce kena. Amerîka, Rusya û Tirkîya goreyê xo têgêrenê. Ma tam nêzanê ê çi wazenê la seba ke waştişê înan bêrê ca her çî kenê ma naye zanê. Nika mabênê Kurdîstanî de dêsî yenê ronayene. Bi ronayîşê nê dêsan wazenê ke Vakur û Rojawanî cêser bifînê, yew bînan ra raqilnê.  Kurdîstan verî kerd çar perçeyî nika wazenê ke hîna perçe bikerê û şarê kurdî erdê înan ra bikerê.‘‘

Derwêşî qiseykerdişê xo wîna qedîna: ‘‘Têna yew rayîrê ma esto o zî yewbîyayîş o. Kam partîye bena wa bibo kam ke seba yewîya kurdan destê xo derg bikero ma amadeyê ke cade nê destî bigêrê paştî bidê înan. Na babete de ma çirey peyser game nêeşte. Ma ganî îtîfaq bikerê.  Kam yew perçe beno wa bibo ma amadeyê ke tewrê heme aktîvîteyanê yewîya neteweyîye bibê.‘‘