Bi mabênçîya Koalîsyonê Mîyanneteweyîyî mabên Hêzanê Sûrîyeya Demokratîke (QSD) û Tirkîya de adirbirnayîşo ke amebi plankerdene nêame caardene.

Dewleta tirke wazena Turbeya Suleyman Şahî wa bikirişîyo cayê ci yê verênî û eynî wextî de herêma ke qala ci yena kerdene de warê hendê yew kîlometrekare  de bi çekanê giranan wa baregehê xo rono. Nê semedî ra pêkerdiş nêbi; wina qeyde adirbirnayîş nêame caardene.

Fermandarê Pêroyî yê QSDyî Mazlûm Ebdî Ronahî TVyî rê qisey kerdbi û vatbi bi mabênçîya Koalîsyonê Mîyanneteweyîyî mabênê QSD û Tirkîya û awanîyanê pabesteyê ci de adirbirnayîş do bibo û seba ke Turbeya Sulehman Şahî bêro kiriştene çîyo ke destê înan ra yeno do bikerê.