Konvoyêkê artêşa tirke ya îşxalkere û MÎTî serê sînorê şaristanê Dêrikî yê Îdareyê Xoserî de gêra.

Konvoyê 14 wesayîtan 25ê çeleyî de saete 14:15 de sînorê Berave yê Dêrikî de gêra. Goreyê zanayîşanê ke çimeyanê herêmîyan ra gêrîyayî dewleta tirke ya îşxalkere seba hêrişêkê neweyî sînor de keşîf kena.

Ame parekerdene ke wexto ke konvoy resa hîrêgoşeyê Tirkîya, Sûrîye, Iraq qereqolê Mexara yê qezaya Silopî de leşkeran pêvînayîş kerd.

Balkêş o têgêrayîşê leşkerîyî gefanê Erdogan û zîyaretê Wezîrê Pawitişî Hulusî Akarî yê verbi PDKyî ra dima zêdîyayî.