Basil Mihemed Nezîr sînorî de heta dewleta tirke ra ame birîndarkerdene û seba ke bêro weşkerdene ame berdene bi Nêweşxaneyê Dewlete yê Qoserî. Nezîrî vat wexto ke o nêweşxane de bi velka ey ameye diznayene û venga dezgehanê mîyanneteweyan da.
Basil Mihemed Nezîro 27 serre yo ke Dirbêsîyê ra yo di serrî verê cû wexto ke xîret kerdêne derbazê Qoserê bibo hetê leşkeranê tirkan ame birîndarkerdene. Nezîr dima ke birîndar bi, îşkence zî bi ey ame kerdene û dima ame berdene bi Qereqolê Cendirmeyan ê Mêrdînî. Nezîr dima Nêweşxaneyê Dewlete yê Qoserî de ame weşkerdene. Nezîr ame amelîyatkerdene û bi hetkarîya keyeyê xo agêra Dirbêsiyê. Dima ke agêra nêweş kewt û şi nêweşxane. Uca de pê hesîya ke velka ci çin a.
Nezîrî derheqê serebûtî de wina vat: "Wexto ke ez nêweşxaneyê Dewlete yê Qoserî de ameyêne weşkerdene velka mi ameye diznayene.Seba ke narkoz dabi mi, hişê mi sereyê mi de nêbi. Wexto ke hişê mi ame mi sere ez pê hesîya ke di cayan ra ez amelîyat kerde, la çîyêk nêame mi vîrî.
Nezîrî îfade kerd ke o binê kontrolê dewleta tirke de amelîyat bi û parê leşkeranê tirkan diznayîşê velka ey de esto. Nezîrî di serran ra dima hêrişanê dewleta tirke ra neçare mend ke reyna koç biko. Nezîr û keyeyê ey nika Hesekê de dibistanêke de manenê.
Dayîka Nezîrî Zehra Bedran vat: "Lajê mi nika bêvelke ciwîyeno. Serre û nême ra nat her menge gonî danê ci. Ez lajê xo tim bena nêweşxane. Mengêk de 30 heta 40 lîraya tirkan vayê nêweşxaneyî dana. Ma feqîr ê. Hînî ez nêzanena ke ma vayê nêweşxaneyî senî bidê."
Rêxistina Heqanê Merdiman a Sûrîye (SOHR) vistibi rojeve ke dewleta tirke senî dizdîya organan kena. 25ê teşrîna peyêne de F.T. teqayîşêkê Girê Sipî ra dima birîndar bibi û hetê leşkeranê tirkan ra amebi berdene bi nêweşxane û bi vatişanê şahîdan organê ci amebî diznayene. SHORî venga dezgehanê mîyanneteweyan kerdibi ke na babete ser o cigêrayîş bikerê.
