Xebatkarê weşîye wexto ke şîyê birîndar û şehîdan meydanî ra berz bikê, hetê dewleta Tirkî ra ameyî qetilkerdene. Xebatkarê weşîye yê Heyva Sor a Kurdistanî zî xîret kenê ke xo biresnê sivîlanê ke cuya înan binê tehlûkeyî de ya.

'Xebatkarê Weşîye Yenê Qetilkerdene'

Bêrîvan Şêxo ya ke Dirbesîyê ra ya, hêrişan rê nêrazîbîyayîşê xo mojna û vat ke: "Ez Dirbêsîyê de xebetîyena û nika seba ke ma 3 şehîdan defin bikê tîya de ya. Seba ke dewleta Tirkî ya îşxalkare şaristanê ma îşxal kerdî, ma nêeşkenê şehîd û birîndaranê xo Serêkanîyê û Girê Spî ra berz bikê. Embazê ma seba ke sivîlan bixelisnê kewtî rayîr. La ê embazanê ma destbend kenê û dima qetil kenê. Dewleta Tirkî nêverdena ke ma wezîfeyê xo bîyarê ca."

Xebatkarê Heyva Sorî Mihemed Osmanî zî vat: "Ez xebatkarê Heyva Sor a, veng dana Neteweyê Yewbîyayeyî û Xaça Sûre ke nê karê ke ma kenê karê wijdanî yê. Ganî nê hêrişanê dewleta Tirkî rê vajê bes o. Neweşxane û ambûlansê ma benê hedef. Heta nika 4 ambûlansê ma yê Heyva Sor, xebatkarê ma û birîndarê ma yê ke ambûlansan de bîyî, vîndî bîyî. Ma nêeşkenê înan ra xeberêke bigêrê. Girê Spî de 3 embazê ma ameyî qetilkerdene. Ma veng danê pêroyê merdimanê ke wayîrê wijdan ê, û dezgehan. Erdogan û çeteyê ey hêrişê ma kenê. Ma nê hêriş û qirkerdişan qet qebûl nêkenê."