Şewa Çarşemeyî nêweşxaneyê Serêkanîyê ame bombavernayene. Muxabirê Ersîn Çaksuyî şertanê giranan de xo resna nêweşxane, îfade kerd ke şewe di rey nêweşxaneyî rê hêriş ame kerdene. Hêriş  de asta pîle ameye şiknayene la nêweşxane hema yeno hedefkerdene.

Çaksûyî vat: "Binê şertanê giranan de ma xo resna nêweşxane. No nêweşxaneyê verên ê Serêkanîyê yo. Xebatkarê weşîye binê bombayan û hêrişan de xîret kenê ke nêweşan weş bikerê. Dimayê hêrişanê şewe û sibayî, nêmroja Pancşemeyî reyna bêweşxane bîyo hedefê hêrişanê îşxalkaran.

Çaksûyo ke wextê hêrişî de nêweşxane de bîyo, da zanayene ke saeta ey 20.50 bîye vengê çekan ameyî eşnawitene. Çaksûyî vat ke nêweşxane hetê Hêzanê Asayîşî û  Wezîfeyê Xopawitişî ra yeno pawitene û beşê ci de roştîye ameye hewnakerdene. Her ke şino vengê çekan benê zêde û nêzdî benê. Şervanêk şebekeyê nêweşxaneyî ra o hetî ser guleyan erzeno. Serê nêweşxaneyî de zî şervanî dekewenê çeperan û verba hêrişan nêweşxane pawenê. A hêle birîndarêkî yeno berdene bi nêweşxaneyî û yeno weşkerdene. Teberî ra vengê taqayîşî yenê. Rîyê şerî ra boya barûtî yena nêweşxane zî. Guleyan tayê camê pancereyanê nêweşxaneyî şikitî, erd de parçeyê camî estê."

Mabênê vengê çekan û bombayan de xebatkarêka weşîye  pare kerd ke no hêriş têna verba şervananê YPG/YPJ nîyo û vat: 'No qirkerdiş o'.  Xebatkarêko merde esto. Seba ke elektrîk çin o, çilayêke serê ci de çarnenê. Xebatkara weşîye behs kena ke hêrişê Serêkanîyê de cinîye, domanî û kalpîrî ameyî hedefkerdene û xebatkarê weşîye yê şarî do heta peyêne xebatanê xo bikê. Wezîfedarêkê weşîye mojna ke zafê merdimî rîyê hêrişanê îşxalkaran û qirkeran ameyî kiştene û vat: "Tede domanî, cinîyî estî, tayê înan zî birînê înan giran ê. Şervananê birîndaran zî anê tîya. Lê exlebî sivîl ê. Ma do heta peyêne xo ver bidê."

Wezîfedaranê weşîye yê Amerîka ra Mary Fernaces Rosena ke nêweşxane de kar kena, vat ke wexto ke birîndarî nêweşxaneyî ra ameyî berdene ambûlansan dayêne. Nika nêeşkenê nêweşan û birîndaran berê, ancî seba ke weşkerdişêko baş nêno kerdene, zafê înan wefat kerd. Rosene vat ke da konvoya sivîlan ro, ganî teyarayê şerî yê Tirkî bêrê vindertene û wareyê hewayî bêro padayene. Eke wina dewam biko, pêroyê nêweşî yê nêweşxaneyî zî do wafat bikê.