Mexdûrê tewr pîlî yê îşxalê Tirkîya doman ê. Domanê ke benê hedfê galan heqanê xo yê bingehînan kenê vîndî. Bi galanê îşxalî yê ke 9ê teşrîna verêne de despêkerdîbî  bi seyan merdimî amey kîştene, û nînan ra bi desan zî domanî bîy. Dewleta Tirkîya ya îşxalkere galan de çekê qedexekerdeyî ke êno texmînkerdene ke fosforo sipî yo xebitnayî. Zaf domanî bi nê çekan bîy birîndar û bedenê domanan veşa. Domanê Dirbêsîyê hişyarê na hovîtî yê. Ê her yewî yew vateyê xo esto. Pêro zî mexdûrê îşxalî yê û vera nê îşxalî bihêrs ê. Nê azê neweyî zî hovîtîya Dewleta Tirkîya şinasnaye. 

Mîrna kênekeka qijkek a. Rîyê xo hîna zî huyeno. Çimê xo yê keskî berîqîyenê. Vana “ ma wazenê ke agêrê dibistana xo.”  La ters û qisaweta xo ya galanê Dewleta Tirkîya zî nênimnena. Mîrna vana “Tirkî kewtê na herême, ma tersenê.” Û destnîşan kena ke înan bîrîya cuya xo ya verê îşxalî kerda. Mîrna vana: “ma wazenê agêrê dibistana xo, ma wazenê cîranê ma agêrê û sey verî têleye de bê.” Mîrna domananê Serêkanîye ke bi çekanê qedexekerdeyan ameyê veşnayenê zî ana vîrî û naye persena “gelo zerrîya kesî nêveşena?”

 ‘Wazenê Newe Ra Agêrê Dewanê Xo'

Her çar domanî pîya veng danê û vanê “Erdogan domanan mekişe”. Înan ra yew nîşanê serkewtişî bi engiştanê xo virazeno û  huyeno. Pey cû înan ra yew Erdoganî ra vano “Serêkanîyîjan to rê se kerd ke ti domananê înan kişenî?” Domanî mesajî zî danê û vanê “Ma domanê Dirbêsîyê yê, to ra nêtersenê.”

Yew kêneka bîn a Dirbêsîyê ke  nameyê xo Gulî ya vana ke Serêkanîyê ameya îşxalkerdene û domanî êdî nêeşkenê perwerde bivînê. Vana ke a zî nêeşkena şora dibistane û destnîşan kena “Fosfor eşt Serêkanîyê. Ez hêvî kena ke ma bieşke şorê dibistane û reyna cîrananê xo reyde bê.”