Dûrzîyê ke Fîlîstîn, Urdun, Lubnan, Îsraîl û Sûrîye de ciwîyenê, se ra 3.5ê nufusê Sûrîye ano meydan. Dûrzîyan rê şerê zereyî yê Sûrîye ra verî heta rejîmê Baasî ra cîyakerîye ameyêne kerdene. Şerê zereyî yê Sûrîye de heta rejîmê Sûrîye û Îhvanî ra ame xîretkerdene ke dûrzîyî hetê înan de şer bikerê û vera dûrzîyan qrikerdişî ameyî kerdene.

Dûrzîyanê Sûveyde ra yew zî avûkat Adîl El Hadî yo. El Hadîyî ANFyî reyde derheqê polîtîkaya rejîmî ya vera dûrzîyan, hêrişanê vera dûrzîyan û waştişê înan de qisey kerd.

Qiseykerdişê El Hadîyî ra beşêk wina yo:

''Polîtîkayanê rejîmî yê vera dûrzîyan tesîrê weşîye zî kerd coka ma vera vîrusê Korona bêpawitiş mendî. Erdê ke ma tede ciwîyenê de zîret zehmet o. Serra 1970î ranata zî rejîmî vera ma polîtîkayê marjînalkerdişî û xizankerdişî ard cayî. Sûrîye de hem rejîmî hem zî komanê cîhadîstan vera ma qirkerdişî kerdî. Qirkerdişê serra 2000î de 12 kesî merdî, 50 kesî zî birîndar bîyî. Nê merdimî pêro sivîlî bîyî. Serra 2012î de şaristanê Dera de El Nûsrayî 18 sivîlî remnayî û qetil kerdî. 10ê hezîrana 2015î de reyna El Nûsrayî şaristanê Îdlîb de 20 dûrzîyî qetil kerdî. 4ê êlûla 2015î de vera konvoyê lîderê şêxan Şêx Wahîd El Baloosî û nêweşxaneyê neteweyî hêriş ame kerdene û netîceya hêrişî de 58 kesî şehîd bîyî. DAÎŞî 27ê temmuza 2018î de hêrişê rojhelatê Sûveyda kerd û 365 kesî şehîd bîyî, bi seyan kesî zî birîndar bîyî. 26ê adara 2020î de Fermandarê Baskê Pêncan ê ARtêşa Ahmet Alawde 17 sivîlî qetil kerdî. 

Ma zaf qerqilîyenê ke qirkerdişê neweyî do bêrê kerdene. Hewceyê ma pê hêzêkê xopawitişî esto. No seba ma zaf girîng o. Şarê dûrzîyî Sûrîyeya demokratîke û azade wazenê. Dûrzîyan zaf dejî antî, ame marjînalkerdene coka cuyêka azade û rûmetêne wazenê. Ma wazenê ke Sûrîyeya demokratîke, lîberale, laîke awan biba û heqê ma pê qanûnê bingeyî bêrê pawitene.

Kesê ke modelê Îdareyê Xoserî yê Demokratîkî yê Rojawanî cigêrayîş kenê vînenê ke şarê Rojawanî demokratîkbîyayîş aferna. Rejîmê Baasî xîret keno ke modelê Îdareyê Xoserî sey xirab bimojno. La seba çareserîya krîzê Sûrîye modelê Îdareyê Xoserî yê Demokratîkî modelo tewr raşte û yewkerde yo.''