Fermandarê QDS'yî Mazlum Ebdîyî Ronahî TV'yî rê qisey kerd û vat armancê dewleta Tirkî pêroyê herême îşxalkerdiş o û têna heta peyêne pê xoverdayîşî eşkenî hêrişanê îşxalkarîye çin bikê. Roportajê Mazlum Ebdîyî yê rojnamegerê Ronahî TV'yî Delîl Zîlanî reyde wina yo:

"8 rojan ra nata hêrişê dewleta Tirkî ya îşxalkare dewam keno. Nê hêrişî nika serê sînorî ra 150 kmyî ameyî dekewtî erdê Sûrîye, Serêkanîyê û Girê Sipî ra dest pêkerd ke debikewe zereyî. Xovardayîşêko pît ê verba nê hêrişan dewam keno û do dewam bikero. Dewleta Tirkî û çeteyê aye bi hezaran leşkeran, bi seyan tank, panzera, teyarayanê keşfî û şerî hêriş kenê. Bi taybetî Ezaz, Bab, Efrîn de se hezaran ra zêdêr çeteyî DAÎŞ û El Nusra ardî. Heta nika şervananê ma dimayê xoverdayîşêko pîl Girê Sipî ra tepîya agêrayî. Xoverdayîşo pîl Serêkanîyê de dewam keno. Leşkerê artêş a îşxalkare dekewtî perçeyo qijkek ê şaristanî la hema têkoşînê ma yo pîlî verba hêrişan dewam keno. Dewleta Tirkî wazena ke dormeyê Serêkanîyê bigêre.

Xoverdayîşê Serêkanîyê Destan O

Eşkerayîya dewleta Tirkî ke vana 'Serêkanîyê kewta dest' zûr a. Uca  xoverdayîşêko tarîxî dewam keno. Seba ke Serêkanîyê sînorê Tirkîya de ya, dewleta Tirkî pê pêroyê hêzê xo hêrişê ci kena, têkoşîno ke verba ey de yeno kerdene, sey destan o. Rojakewtena Girê Sipî erazîyêko veng o. Teyarayê şerî yê dewleta Tirkî pê tankan tîya ra kewtî rayîrê M4'î. La seke çapemenîya înan îdîa kena, hende nêkewtê zereyî. Tayê dewî destê ma de yê, tayê dewî destê înan de yê. Rayêk waşt bêrê rayîr kontrol bikê la ma da înan ro û uca ra ê vetî. Hema zî wazenî nê rayîr kontrol bikê û uca ra şorê Kobanê. Vizêr şan dewleta Tirkî ya îşxalkare û çeteyanê aye waşt ke debikewî Minbîc. Di baskan ra hêrişî kerdî. La dimayê cewabdayîşê hêzanê ma verê nê waştişê înan ameyî girewtene. Nika tîya de hêrişî ameyî vindarnayene.

Sivîlî Bi Zanayîş Yenê Qetilkerdene

Hêrişêko pîl reyde hêrişêko pîl yeno dayene. Ma zî verba nê hêrişanê îşxalkaran xoverdayîşêko pîl danê. Heta nika 205 embazê ma ke zafê înan rîyê hêrişanê teyarayan ra şehîd kewtî. La qirkerdişêko pîl ê verba sivîlan esto. Hem Serêkanîyê de hem zî cayanê bînan de nê qirkerdişî ameyî kerdene. Heta nika 205 sivîlî şehîd kewtî û 300 sivîlî zî birîndar bîyî. Seba dewleta Tirkî ya îşxalkare ha sivîl ha şervan, ferq çin o. Deleta Tirkî ya îşxalkare wazena ke bi nê hewayî netîce bîgêra, têna Rojawan da ney, pêroyê cayan de ke îşxal kerdî wina kena. No stratejîyê aye yo, şar wareyan ra vejena. Naye ra sivîl, doman, pîr, cinî û şervan ferq nêkeno, her ca bombardûman kena. Şarê ma zî seba ke zerar nêvîno cayanê xo terikneno. Xora no sîyasetêko bi zanayîş o. Dewleta Trikîya îşxalkare wazena ke şarê ma herême ra biveje û ê bînan bîyare tîya.

Amerîka Berpirsîyarîya Xo Nêarde Ca

Ganî Amerîka berpirsîyarîya xo bîyara ca. Seke yeno zanayene wextanê peyênan de Amerîka mabênê ma û dewleta Tirkî de bîyo mabênçî û yew makanîzmayê asayîşê sînorî amebi sazkerdene. La dewleta Tirkî ya îşxalkare na peymane ca verdaye û vat ke nê şertan qebul nêkena û hêriş kena. Tewirê DYA yê verba naye zaf zeîf bîyo, berpirsîyarîya xo nêrarde ca. Vat ke Tirkîya endama NATO ya û a verba endamêka NATO do şer nêka. Amerîka verba hêrişanê Tirkîya mutefîkê xo yê verba DAÎŞ'î nêpawit. Verê cû soz da ke Kurdan bipawe û DAÎŞ bi temamî tasfîye bika, la no sozê xo nêard ca. Seke ma înan ra vat, no nêno qebulkerdene, Amerîka zî naye zanena. La nika rewşe seke şima zî vînenê o tewr a. Eke şer nêro vindarnayene o wext ma tawirê DYA sey îxanet qebul kenê.

Pêkerdişê Bi Rûsya û Sûrîye

Seba ke ma vernîya hêrişê dewleta Tirkî bîgero ma bi Rûsya û Sûrîye pêkerd.Nê pêvînayîş de berpirsîyarê leşkerî ê Rûsya, Sûrîye û ma estbî. No îtîfaq muhîm o. Pêkerdişê ma sîyasî nê leşkerî yo. Herêma ke yena waştene ke bêro îşxalkerden 30 km ya û xeta sînor de ya. Amerîka vana ez mudaxaleyê tîya nêkena. Ma û dewleta Tirkî ya îşxalkare na herême de şer kenê. Çarçeweya pêkerdişê ma de leşkerê Sûrîye do na herême de pîya bi hêzanê ma yê QSD’yî vera Tirkîya şer bikerê.

Wezîfeyê Ma yo Verên Pawitişê Şarê Ma yo

Ma verê cû zî vatibi û parekerdibi ke eke dewleta Tirkî hêrişê ma bike, têkoşînê verba DAÎŞ'î seba ma beno meseleyo diyîn yan zî hîrêyin. Nika no tewir o. Hînî armancê ma yo verên no yo ke ma hêrişanê verba cografyayê xo vindarnê û nê îşxalkaran erdê xo ra bivejê. Bêşik DAÎŞ seba şarê ma û merdimîye tehlûkeyêko pîl o, la hînî seba ma meseleyê verên DAÎŞ nîyo. Çarçeweya têkoşînî yê verba DAÎŞ'î îtîfaqê ma û DYA dewam keno. Tewr nêbo hetê fermîtîye ra wina yo, hetê pratîkî ra zî tayê cayan de wina yo. Nika nêzdîya 12 hezar DAÎŞ'ijî û keyeyê înan estê. Aslê xo de DYA wazena ke peymana verba DAÎŞ'î do dewam bika. La wezîfeyê ma yo verên pawitişê Rojawanî yo. Nika ma verba hêrişanê DAÎŞ'î xo pawenê. Çunke ma zanenê ke dimayê hêrişanê Dewleta Tirkî DAÎŞ newe ra zîl da û har bîyo. DAÎŞ'î zafê cayan de hêrişî kerdî.

Tradîsyonê Xoverdayîşê Rojawanî

Xora xoverdayîşê Rojawanî heme dinya de yeno zanayene. Ewro vera îxalî heme dinya paştî dana Kurdan.  Bêşik o ke xo ma rê sey deyndarî vînenê. Heme dostê ma vanê ke  ê kişta ma de yê la nê razînêbîyayîşî nêvejenê. Hema hêrişê îşxalî dewam kenê. Ganî partîye Kurdan gamane pîtan, pratîkan bierzî. Dewleta Tirkî dişmena ma hemeyan a.Têna wazena ke Kurdan çîn bikero. Roje roja xoverdayîşî ya bi kombîyayîş û eşkerayîyan nêbeno. Ganî pratîk de veng bidîyo xoverdayîşê Kobanê, Serêkanîyê, Grê Spî û heme cayanê xoverdayîşî. Pêkerdişê ma ê Sûrîye hema tam nêameyo ca. Raşto artêşa Sûrîye ameya Mibic û Til Temîr la pêkerdişê ma xeta ameyîşê înan ê xeta sînorî yo. Ez tîya ra heme şeravananê YPG, YPJ û QSD’yî û heme şarî ke ûca yê silam kena. Embazê ma xoverdayîşêko tarîxî danê. Bitaybetî zî embazê ka Serêkanîyê de şer kenê înan silam kena. 8 rojî vera teknîkê xurtî xover danê. Ez bawer kena ke cayo ke xoverdayîş esto do serkewtiş zî bibo. Xoverdayîş est do demo kilm de serkewtiş zî bibo.''