Ebdîyî vat ke hêzê înan esto ke Efrînî bigêrê, la mesele tena Efrîn nêyo. Ebdîyî da zanayene ke ê dîyalogî heme hetan ser o ferz kenê.

 'Tirkîya bi Ser Nêkewte‘

Fermandarê QSD’yî yo pêroyî Mazlûm Ebdîyî rojnameyê Ozgur Polîtîka rê qisey kerd û vat, „Seke Rayber Ocalan zî vano, Sûrîye de sey Tirkîya xetemîyayîşêk esto. Destpêkê meseleyê Sûrîye de stratejîyêka dewlete Tirkîya estbî. Goreyê ma Tirkîya bi ser nêkewte. Efrîn de zî bi ser nêkewta. Tirkîya serra 2011 de waşt bi hêzanê mabênkaran wareyî ser o bibo serdeste, la bi ser nêkewte. Serranê 2012-2013 de serê OSO’yî ra hêrişê ma kerd. Eksê nê de ma hîna bîyî xurt û ma OSO bin fîna. Serranê 2013-2014’î de bi rayîrê El Nûsra û El Kaîdeyî Dêrike ra heta Efrînî hêrişê ma kerd. Ma ê zî bin fînayî. Tewr peynî de şerê Kobanê de DAÎŞ ramit ma ser, la ma bi tîfaqanê xo yê mîyanneteweyîyan DAÎŞ bin fîna û ma Dêrazor ra vejîyayî. No binkewtişê Tirkîya yo. Dekewtişê Efrînî zî seba Tirkîya serkewtiş nêyo. Mendişê înan ê Efrînî seba înan tehluke yo.“

 Ebdîyî qiseykerdişê xo de vat, „Ma key biwazê ma eşkenê bi hemleyêka pîle Efrînî bigêrê. Hêzê ma esto. Meseleyê ma tena Efrîn nêyo. Meseleyê ma Tirkîya dir tena Efrîn nêyo. Erdoganî bi xo qerar da. Do Efrînî ra dekewtêne û heta Şehba, Minbic û rojakewtena Firatî bigirewtêne. Ne hêzê mîyanneteweyîyî û ne zî ma do destûr bidê nê çîyî.“

 'Îhtîyacîya Tirkîya bi Rayber Apoyî Esta‘

“Ez eşkena vajî ke îhtîyacîya Tirkîya bi Rayber Apoyî esta. Ê wazenê Amerîka dir çareser bikerê la no yo netîce raste de yo. Rayber Apo vano, ‘Tena ez eşkena nê meseleyî hal bikerî.’ Rayber Apo tena qalê Sûrîye nêkeno, qalê Tirkîya zî keno. Eke bi mabênkarîya Amerîka biwazê hal bikerê, do hal bikerê. Ma zî no çî vato. Projeyê ma û yê Rayber Apoyî seypê yo. Nika rejîmê Şamî çareserîye rê amade nêyo. Şertê înan no yo ke ma otorîteya înan qebul bikerê. Ma Şamî dir şer nêkerdo ke ma înan dir aşitîye bikerê. Dewayêka ma ya neteweyîye esta û ganî bêro halkerdene. Rjîm ne wareyê sîyaseyîyî e û ne zî wareyê ekonomîk û eskerîyî de nêeşkeno ma qebul nêkero.”

Idlîb

Ebdîyî persê derheqê Îdlîbî de zî cewa kerdî û vat, “Rûsya hetkarî ma ra waste. La ma qebul nêkerde. Tu karê ma Idlîb de çino. Meseleyê ma Efrîn o. Rûsya goreyê menfaatanê rejîmî têgêrena. Wareyê bînî dayî rejîmî û na yewe ra Efrîn da. Têkilîyê ma derbeyêka pîle werde. Embazê şî heta Moskova û pêvînayîşî kerdî. La seba çareserîye tu nizdbîyayîşê Rûsya çinbi. Meseleyê Efrînî de paştîya Tirkîya gênê. Şehba û Til Rifat de paştîya Tirkîya gênê.”

Fermandarê QSD’yî yo pêroyî Mazlûm Ebdî derheqê çeteyanê DAÎŞ’î yê ke ameyê tepiştene zî vat ke “Ganî sazî û dewletî ma dir bixebetîyê. Destê ma de 12 hezarî çeteyê DAÎŞ’î estê. Ganî dewletê xerîbî hetkarî bidê ma. Tayê dewletî hetkarî danê la tayê nêdanê.”