Vizêr heyetêkê herêma Firatî merkezê Fermandarîya Pêroyî ya QSDyî ya Qamişloyî zîyaret kerd û Fermandarê Pêroyî yê QSDyî Mazlûm Ebdîyî pare kerd ke seba yewîya neteweyîye xebatê neweyî estê û hêzê sîyasîyî bi hawayêkê musbetî ewnîyenê înîsîyatîf. Heyet hetê Mazlûm Ebdî, vervatoxê YPGyî Nûrî Mehmûd û mudirê Buroyê Çapemenîye yê QSDyî Mistefa Balîyî ra ame pêşwazîkerdene.

Kombîyayîşî ra dima Mazlûm Ebdîyî dezgehanê çapemenîye reyde qisey kerd û vat: ''Seba yewîya kurdan qewimîyayîşê neweyî estê, pêro hêzê sîyasîyî zî bi hawayêkê musbetî ewnîyenê na mesele ke înan ra tay zî Partîya Yewîya Demokratîke (PYD) û ENKS ê. Derheqê na babete de mabênê çend rojan de netîceyê musbetî do eşkera bibê.''

Ebdîyî venga pêro dezgehanê sivîlan, partî û hêzanê sîyasîyan ê Rojawanî kerd ke paştî bidê înîsîyatîfê yewîya kurdan û seba ci têbigêrê.

Bextîyar Husênî zî da zanayene ke hewceyê kurdan pê yewîya neteweyîye esto. Husênî venga terefanê sîyasîyan ê Rojawanî da ke seba yewîya neteweyîye bixebitê.