Tirkîya pîya bi kampanyaya weçînitişê peyênî  polîtîkayê xo yê hêrişkarî zêdînayî. Çarçeweya pakkerdişê etnîkî de herra kurdan a ke ameya îşxalkerdene de  kolonîyê ke ameyî ronayene, tede grûbê ke dewleta tirke vîjnayî, yenê cakerdene.

Tewr peynî de dewa Kefer Rume ya qezaya Şera ya Efrînî de  viraştişê kolonîyê neweyî ame destpêkerdene. Dewe de çar kat 50 bînayî ameyî viraştene. Dîya zanayene ke do nêzdîya dewe de 200 konut zî bêrê viraştene. Tirkîya nê keyeyan pîya bi rêxistinanê Katar, Kuveyt û Fîlstînî virezena. Yaroje dewa Şadêrî ya qezaya Şêrawa de zî wina 50 bînayî ameybî viraştene. 

Dewleta tirke û çeteyê ci 2018 wextê îşxalkerdişê Efrînî ra nata kenê ke demografîya herême bibedilnê, bikero tirk. Coka nê bînayî yenê viraştene û tede keyeyê çeteyanê ke pabesteyê dewleta tirke yê, yenê cakerdene.