Ewro 10ê Kanûne Roja Heqanê Merdiman a Dinya ya. Labelê Efrîno ke 18ê adara 2018î de hetê dewleta tirke ra amebi îşxalkerdene vurîyayo merkezêkê sûcanê merdimîye.

Şaristan de verî se ra 96 kurdî ciwîyayêne. Goreyê tay kesan nika se ra 23 yan zî se ra 15ê nufusî kurd ê. Şaristan de 15 hezar elewîyan ra zî 200 kesî, 25 hezar êzidîyan ra 2 hezar êzidîyî û nêzdîyê hezar xiristîyanî mendî. 

Efrînijî îşkence, qirkerdiş, gef, tecawuz, remnayîş, tacîzî ra neçare mendî ke şaristanî ra biremê û nêzdîyê 100 hezar efrînijî Şehba de ca bîyî. La her roje dewleta tirke Şehba zî dana bombayan ver.

20ê çeleyê 2018î destpêkê hêrişê îşxalî û bombarumanan ra nata Efrîn de tewr tay 686 sivîlî ameyî qetilkerdene. Tewr peyêne 96 cinîyî hetê îşxalkeran ra ameyî remnayene, 7ê înan raştê hêrişê cînsîyî ameyî. Îşxalkeran 71 cinîyan rê tecawuz kerd. Goreyê Rêxistina Heqanê Merdiman tewr tay 88 sivîlî hetê îşxalkeran ra pê îşkenceyî kişîyayî.

Efrîn de serra 2021î de zî serebûtê îşkence, qirkerdiş, gef, tecawuz, remnayîş, tacîzî û fîdyewaştişî dewam kerd.

Dewleta tirke 2021 de 13ê ci cinîyî, 13ê ci domanî 49 sivîlî qetil kerdî. Rêxistina Heqanê Merdiman a Efrînî pê belgeyan eşkera kerd ke 2ê ci cinîyî 6 kesî pê îşkenceyî ameyî qetilkerdene.

Nînan ra yew zî Mewlude Numan bîye ke gulana 2021î de pê îşkenceyî Zîndanê Raî de kişîyaye. Nemete Behçe Şêxoya 32 serra ke digane bîye pê îşkenceyî qetil bîye.

Hêriş û qirkerdişî sey Efrînî Mare, Ezaz û Şehba de zî yenê kerdene.

23ê çeleyê 2021î de bombardumanê dewleta tirke de Til Rifet de Seededîn El Qeys, Nazliye Mihemed Mûstafa û domano 5 serre Macid Yasir Sekran û domano 12 serre Ebdulhemîd Sekran ameyî qetilkerdene. 6ê nîsana 2021î de bombardumanê dewleta tirke de Şêrawa û Şêra de 12 kesî ameyî qetilkerdene. 13ê hezîrana 2021î de reyna Şêrawa de 3 sivîlî bombarduman de birîndar bîyî. Dewanê Şehba de netîceya teqayîşê mayînanê DAÎŞ û Tirkîya de 6ê ci domanî 10 kesî ameyî qirkerdene û 15 kesî zî birîndar bîyî.

Dewleta tirke 18ê adara 2018î ra dima bi temamî Efrîn îşxal kerd û vurna îşkencexane. Her dewêka Efrînî de tewr tay yew keye de serebûtê îşkence û remnayîşê merdiman qewimîya.

Efrîn de tewr tay 8 hezar û 455 kesî hetê îşxalkeran ra ameyî remnayene. Aqîbetê nêmeyê înan nêzanîyeno. Rêxistina Heqanê Merdiman a Efrînî pê belgeyan eşkera kerd ke nê kesanê ke ameyî remnayene ra tewr tay 40 kesî bi hawayêkê îlegalî ameyî berdene bi Tirkîya û cezaya girane dîyaye înan. Xeylêk kesî zî hetê cergan ra pê bedelê fîdye vera dîyayî. La nê heman kesî reyanê bînan hetê cergan ra ameyî remnayene û seba înan cergan fîdye waşt.

Goreyê Rêxistina Heqanê Merdiman a Efrînî şaristan de serebûtê remnayîş û fîdyewaştişî hetê dewleta tirke ra vurîyayo sektorêk. 2021 de tewr tay 655 kesî ameyî remnayene ke 75ê înan cinîyî, 5ê înan zî doman bîyî. Îşxelkaran şaristan de dest na keye, baxçe, bax û zeytûnêranê merdiman ser.

Zîndananê Tirindê, Meydan Ekbes, El Kerame, Mowaslat, Beradî zîndanê muhakemekerdişî yê îşxalkeran ê. Zîndanê Ezher Efrîn, Îtîhad El Erebî, Eşrefiye, Mahmûdiye, Kolana Vîlla, Amîr El Gubarî, Basûtê, Îstasyon, Xirabê, Kefer Canê, gundê Şengêl, Goran, Şiyê, Qermîtalqê û Racoyî zî raşta raşte pabesteyê MÎTî yê. Nê zîndanî pêroyî sey îşkencexaneyî şuxilîyenê.

Vervatoxê Rêxistina Heqanê Merdiman a Efrînî Îbrahîm Şêxoyî da zanayene ke rixmo ke sûcê dewleta tirke pê belgeyan ameyî îsbatkerdene hêzê mîyanneteweyî verê nê sûcan nêgênê.

Şêxoyî vat: ''Rewşa Efrînî her roje bena xirabêr. Şaristan de demografî vurîyena. Remnayîş û fîdyewaştiş bîyî sektorêk. Ma venga pêro dezgehanê mîyanneteweyîyan danê ke ewro roja heqanê merdiman a, coka wa mesuldarîyanê xo bîyarê ca. Ganî dewleta tirke Efrîn, Sûrîye ra bêrê vetene, peynîya îşxalkerîye bêra ardene û efrînijî wa bieşkê abigêrê waranê xo. Wa mesuldarê qirkerdiş û sûcanê merdimîye bêrê muhakemerdene. Mesele û şerê Sûrîye ganî pê qedînayîşê îşxalê Tirkîya bêrê çareserkerdene.''