Şarê Efrînî îşxalê dewleta tirke yê 2018î de koçê Şehba kerdbi. Nika zî hêrişanê dewleta tirke û cerganê ci ra efrînijî Şehba ra koçê Reqa kenê.

Şaro ke resayo Reqa ajansê ma rê qisey kerd.

Mistefa Mihemedî vat: ''Heta ke Şehba de şertê ciwîyayîşî nayê ro ma têkoşîn kerd. Hêrişanê dewleta tirke ra ma ancî koç kerd. Hêrişê vera Şehba giran bîyê, çekêke nêmenda ke vera şarî nêşuxilîyaya. Verê çimanê ma de merdimê sivîlî ameyî qetilkerdene. Di rojan ma rayîran de bîyî. Heta ke ma resayî Reqa ma rojanê zehmetan ra derbaz bîyê.

Îdareyo Xoser wayîrê şarê Şehba vejîya. Yew eleqeyê dewleta tirke û cerganê ci bi Îslamî çin o. Ma erdê çewî îşxal nêkerd, zulmê çewî nêkerd. Ma bi rûmetê xo ciwîyenê. Şarê kurdî teyna nasname û ziwanê xo wazeno. Wa hêzê mîyanneteweyîyî bêrê halê şarê ma bivînê; wa hinî hetê dewleta tirke de mevinderê.''

Îbrahîm Koseyî vat: ''Ma hê koçê diyînî ciwîyenê. Ma dejê pîlî antî, zehmetîya pîle ante. 2018 ra nata ma Şehba de yê. Ma newe musaybî Şehba la ancî hêrişan dest pêkerd. Şar bi giranî ame hedefkerdene.''

Mihemed Henanî vat: ''Dewleta tirke bi teyarayanê şerî bi hezaran merdimê ma qetil kerdî, erdê ma îşxal kerd, keyeyê ma talan kerdî, zeytunêrê ma vêşnayî. Efrîn seke cenet bi la înan Efrînî ra parçeyêk zî nêverdayo. Ma 6 serran Şehba de bi hêvîya agêrayîşî ciwîyayî. La no do dewleta tirke rê nêmano. Ma do rojêke qetî abigêrê Efrînî. Înan Şehba zî îşxal kerde. Nika heman zulm Şehba de yeno kerdene. Sûrîye de, Efrîn de, erdê şarê ma de gureyê dewleta tirke çin o. Erdogan kiştox o. La hêvîya ma mende ya. Ma do abigêrê Efrînî.''