Hetkara Hemserekanê Meclîsê Rayberdişî yê Îdareyê Xoserî Emîne Osê serebûtê ver û peyê Qirkerdişê Qamişloyî ANFyî rê ercnayî.

Osê da zanayene ke rejîmê Surîye bi Qirkerdişê 12ê Adare armanc kerd ke kurdan û ereban bikerê dişmenê yewbînan. Osê vat: ''Rejîmê Sûrîye bi propagandaya şovenîzmê ereban û zûra 'Kurdî wazenê Sûrîye parçe bikerê' waşt nîfaq bivisno mîyanê şaran. 12ê Adare ra dima xeylêk kesî tepişîyayî, çalakîyî ameyî qedexekerdene, polîtîkaya vêşanverdiş û koçberîye şarî rê ameye ferzkerdene. La serewedaritişê Qamişloyî pêro şaristananê Rojawanî û Sûrîye rê vila bi û bi nê hawayî mekanîzmaya Baasî bin şîye.

Têgêrayîşê Azadîye bi tecrube, ercnayîşê raştikênî û analîzkerdişê serebûtanê 12ê Adare ver bi Şorişê Rojawanî şi. Şorişê 19ê Temmuze bi tecrubeyê Serewedaritişê 12ê Adare xo rêxistin kerd, mekanîzmaya xo ya pawitişî xurt kerde, têkilîyê xo yê bi herême xurt kerdî û polîtîkayê rejîmê Baasî pûç kerdî. Merdim eşkeno vajo ke Baas hema zî vera kurdan polîtîkaya înkar û çinkerdişî de israr keno. Rejîm wazeno Îdareyê Xoserî û temsîlkarê ci yê sîyasî MSDyî bi hêzê leşkerî kontrol bikero û goreyê xo têbigêro. Rejîmî herinda ke 12ê Adare de meseleya kurdan çareser bikero dewleta tirke reyde Peymana Adana îmza kerde û hêrişê vera kurdan zêdînayî. Eke mabênê dewleta tirke û rejîmê Baasî de hemkarîyêke çin bibîyêne rejîmî vera îşxalê Girê Sipî, Efrîn û Serêkanîyê tewirê xo bimojnayêne. Kerdişanê rejîmî ra Sûrîye de krîzî dewam kenê.''

Emîne Osê bale ante ser ke menga adare seba kurdan hem menga serewedaritişî ya hem zî menga qirkerdişan a. Emîne Osê vat: ''Şarê kurdî îşxal, qirkerdiş û tarîxî bi xurtî fam keno û bi nê ferasetê xo zî wayîrê vîrameyîş, şehîdanê xo vejîyeno û seba heqê xopawitişî têkoşîn keno.''