Welatanê cîya-cîyayan ra 26 enternasyonalîstan binê sîwana Tugayanê Xebate yê Mîyanneteweyîyan de verê xo dabi Rojawanî la verê Berê Sînorî yê Pêşxabûrî de hetê hêzanê PDKyî ra enternasyonalîstî ameybî astengkerdene.

Enternasyonalîstan naye ser o eşkerayîyêke da û tewirê PDKyî şermezar kerd.

Enternasyonelan ard ziwan ke PDKyo ke waştişê Tirkîya ser o Îdareyê Xoserî rê ambargo keno, nêverda ê Berê Sînorî yê Pêşxabûrî ra derbaz bibê. Enternasyonalîstan vat: ''Ma ambargo û tedaya PDK û dewleta tirke şermezar kenê. Ma şerê dewleta tirke yê vera Têgêrayîşê Azadîye yê Kurdan şermezar kenê. NATO û dewletê bînî verê sûcanê Tirkîya de bêveng ê. Ganî dewleta tirke rê ambargo bêro kerdene.

Ma wazenê Berê Sînorî abibo û ambargo biqedo. Ganî NATO û Yewîya Ewropa qedexeyê vera PKKyî biqedînê, destek nêdê Tirkîya, çalakwanê ke verê xo danê Rojawanî, asteng nêkerê.

Ma pêro aktîvîstan û kesanê demokratan ra wazenê ke wa paştî bidê Şorişê Rojawanî û haştîya Kurdîstanî. Ma seba ke paştî bidê wedarnayîşê ambargoyê vera Rojawanî, menga verê ma de koma diyîne ya enternasyonelan bişawê Kurdîstanî û seba paştdayîşê Rojawanî çi hewce yo bikerê. Paştdayîşê ma yê bi Rojawanî û xîret û têgêrayîşê ma seba cuyêka azade do nêqedê.''