Ambargoyo ke Îdareyê Xoserî yê Rojawanî ser o yo, bi amûranê cuye û tibî dewam keno. Erdlerzanê Bazarcix û Elbîstanî ra dima zî ne ambargo ne zî hêrîşî nêvindertî.

Mabênê Rojawan û Sûrîye de çar berî est ê. nînan ra tay akerde yê tay zî girewte yê. Berê Teqba seba raywanan akerde yo la seba bazirganîye 20ê adare 2021î ra girewte yo. Berê El Bû Asî yê Teqbayî ke rayîrê Halebî ser o yo, tena seba raywanan akerde yo. Tahya Ebû Kehef ê Minbîcî 20 adare 2021î ra girewte yo. Berê Salîhîye yê Dêrazorî tena seba raywanan akerde yo, la nika girewte yo. Herêmê ke hetê dewlete tirke ra ameyî îşxalkerdene, mabênê ucayî û Minbîcî de 2 berî est ê. Berê Um Cilud û Ewd Dadat hem seba raywanan hem zî bazirganîye akerde yê.

Herême ser o tesîro xirab keno

Seba ke berê sînor ê herêma Îdareyê Xoserî yê Rojawanî û Sûrîye girewte yê, no tesîrêko neyînî herême rê keno. Berê Sînorî yê Til Koçerî tena qîm keno ke ma bizanê tesîrêko neyînî yo senîn herême rê keno.

2014î ra nata goreyê qeraranê mîyanneteweyî çar beranê sînorî ra hetkarîya merdimî resayêne Sûrîye. Nê beran ra di berî Tirkîya ra, berêk Urdunî ra û o bînî Iraqî ra (Til Koçer) Sûrîye rê biyênî a. 2020 de ra nata goreyê qanûnê ke Konseya Asayîşî ya Neteweyanê Yewbîyayen de bi newe û vetoyê Rûsya Çînî têna berê ke Tirkîya ra Sûrîye rê benê a, înan ra şawitişê hetkarî seba şeş aşman ame dergkerdene û berê Til Koçer û Urdunî ameyî qefilnayene. Eynî qerar Hazîranê 2020î de ame dergkerdene. Wîna qeyde beranê sînorî yê Bab Al Salam û Bab Al Hawayî ra destûrê şawitişê hetkarîya merdimî ame dayene. Seba ke nê berî destê dewleta tirke û çeteyanê ci de yê hetkarîya seba herêma Îdareyê Xoserî yê Rojawanî ameye astengkerdene. Berê Til Koçerî yo ke bêro tewr gird ê diyînî yê mabênê Iraq û Sûrîye yo, sebebê qefilnayîşê ci yo verên Îdareyo Xoser wa binê şertanê zehmetan de bimano.

Tesîrê milyonêk bextwaştoxanê kampan keno

Herêma Cizîrî de 6, Herêma Efrînî de 5 û Herêma Firatî de zî 6 pêro pîya 17 kampî Vakur û Rojhelatê Sûrîye de est ê ke keyeyê DAÎŞijan zî tede yê.

Herêmanê Rojawanî de mîlyonêkî ra zafêr bextwaştox û koçberî est ê. rixmo ke herêman de  nêzdîya 100 sazgehê hetkarî yê mîyan neteweyî est ê, hetkarîyêka kêmî koçber û bextwaştoxan rê yena dayene.

Ambargo her tim dewam kerd

Dewleta tirke ke serra 2012î ra heta nika bi hewayêko nimite û eşkera hêrîş kerd, nê erdlerzî de zî mabên nêda hêrîşan. 6ê sibate ra heta nika 400 rey teyerayê xo yê keşfî serê Rojawanî ra çarnayî. 21 rey teyerayê şerî, 3 rey bi obusî, 7 rey bi hawan, 25 rey bi doçka, 3 rey bi BKC û reyêk bi B7î hêrîşê herême kerd. Hêrîşêkê bi teyeraya bêmerdimî yê bombabarkerdeyî Kobenê de şerwanêkê QSDyî şehîd bî. Sewbîna rayîrê Qamişlo-Tirbespîyî de 22ê sibate de wesayîtêkî ame bombardumankerdene