Hetkara Hemserekanê Îdareyê Xoserî Emîne Osê derheqê gefanê hêrişî yê dewleta tirke û pêvînayîşê mabênê Tirkîya, Rûsya û Sûrîye de ANFyî rê qisey kerd.

Emîne Osê îfade kerd ke dewleta tirke hêrişanê 20ê teşrîna peyêne de binawanîyê Rojawanî kerdê hedef û 11 kesî qetil kerdê. Osê da zanayene ke dewleta tirke nê hêrişan de îşxalê herême armanc kerdbi la seba ke amade nêbîya nêeşkaya erdî ra hêriş bikera.

Emîne Osê bale ante ser ke Erdoganî rew ra seba pêvînayîşê bi Sûrîye amade kerdêne û vat: ''Seba pêvînayîşê bi Sûrîye Rûsya dewleta tirke rê teda kena. Rûsya seba ke Erdogan weçînayîşan de ser bikewo paştî dana. Erdogan pêvînayîşan de tim wazeno ke QSD û Îdareyo Xoser tasfîye bibê. Hukmatê Şamî zî wazeno ke dewleta tirke Sûrîye ra vejîya û cergê ci zî Sûrîye biteriknê. Erdogan xîret keno ke pê destekê Rûsya Îdareyê Xoserî tasfîye bikero û QSDyî bin bivisno. Eke Erdogan nê armancanê xo bisivno destî hînî cayê bi nameyê Sûrîye do nêmano.''

Emîne Osê dîyar kerd ke eke dewleta tirke reyna hêriş bikera şarê Rojawanî do xo ver bido û vat: ''Vera hêrişanê muxtemelan QSD bi tecrubeyanê serran do xo ver bido. Ma zî sey Îdareyê Xoserî warê dîplomasî û sîyasî de pêro hêzê xo seferber bikerê. Ma nê herêmî destê DAÎŞî ra azad kerdî. La ganî Koalîsyono Mîyanneteweyî seba pawitişê herême erkê xo bikero. Bi nê hawayî rejîmê Şamî û dewleta tirke zî her firsend de do nêeşkê hêrişê herême bikerê.''