'Erdogan nêeşkeno kurdan biqedino '

Emîra Xidira ke maya di şehîdan a dîyar kerd ke a bi domananê xo sereberz a û vat: “ma kurd ê. Wa Erdogan mevajo ke ey kurdî xelesnayê. Nêeşkeno ma biqedeno û çîyê ke kerdê do ey rê memanê.”

Emîra Xidire yew cinîya Serêkanîyij a. Dewleta Tirkan ke 9ê teşrîna verêne vera Vakur û Rojhelatê Sûrîye dest pê galê îşxalî kerd, bi domananê xo ra neçare mende ke koçê  Qamîşloyî bikera. Na reya verêne nîya ke  neçare manenê û Serêkanîye caverdanê. Emîra Xidire domanê xo bi heskerdişê welat û merdimîye kerdî pîl. Kênaya aye 2013î de tewrê refanê gerîlayan bîye û serra 2018î de Gabar de şehîd bîye. Lajê aye Ebdullha Heme (Ocalan) zî 13ê teşrîna verêne 2019î de Serêkanîye de şehîd bî. Emîra Xidire ard ziwan ke a bi lajê xo Ocalanî sereberz a û vat: “Lajê mi fermandar bî, demo ke cad kerd ke embazanê xo bireyno şehîd bî. Bi çekanê kîmyewîyan domanê ma veşnayî.”

Emîra Xidire fîşt vîrî ke tirkan serra 2012î de bi Cephet El Nûsra û DAÎŞî galê Serêkanîye kerd û vat: “Cephet El Nûsra sînorê Tirkîya ra derbazê Serêkanîye bî. Destpêkî de mîyanê înan û Rejîmî de şer vejîya. Teyarayanê şerî bombayî keyeyanê ma ser o varnayî. O taw Erdoganî bi cerganê xo galê ma kerdîbî û serde zî venga ma dayêne ke ma koçê Tirkîya bikerê. O taw ma neçare mendîme û koçê Vakurê Kurdîstanî kerd. Lajê mi Ocalan o taw hîna qij bî. Ma ke uca yew aşme mendê agêrayî Serêkanîye. Demo ke ma agêrayî ma dî ke cergan keyeyê ma îşxal kerdê. Demêkê kilmî de YPGyî cergî herêma ma ra fîştî dûrî. Ma kurdî, armenî û erebî mendî.

'Ma Erdê Xo Ra Dest Vera Nêda‘

Emîra Xidire nîşan kerd ke serra 2013î de Serêkanîye cerganê El Nusra ra ame pakkerdene, o taw tim gef bi înan ameyêne wendene û vat: “Tim vatêne ke do biderê ma ra. Mi fehm kerd ke o yo ke deqûdolaban çarneno Erdogan o. Waştêne bi zor û deqûdolaban welatê ma ma ra bigêro. Ma no zulmê Erdoganî qebul nêkerd. Ma erdê xo ca nêverda, ma şaristanê xo de mendî.  Heta 9ê teşrîna verêne ma erdê xo ra nêvejîyayî. Nîyatê ma çin bî ke ma Serêkanîye ra vejîme. Ma vatêne ‘Şerwanê na herêmê domanê ma yê, ma înan tena nêverdanîme, ma înan rê paştgîrî kenme.’ 9ê teşrîna verêne de teyareyan bomba ma ser o varnayî. Ma reyde domanê qijî estbî. Ma neçare mendîme ke keyeyanê xo ra vejîme û herêma ke yena bombakerdene ra şîme dûrî.

'Demo ke Şerwanê Xo Reynayî Şehîd Kewt‘

Emîra Xidire derheqê lajê xo Ocalanî de wina vat: “Teyareyanê şerî ke bomba varnayî, ma Belete (dewa ke sînorî ser o ya) ra tayê dûrî bîme. Mi nêwaşt ke Serêkanîye ra vejîya, mi waşt ke nêzdîyê lajê xo Ocalanî ba. Roja 4.e ya destpêkerdişê şerî bî. Ez lajê xo Ocalanî gêraya mi ey ra vat: ‘Lajê mi, mi zaf bîrîya to kerda, bê ez to bivîna.’ Ocalanî vat ‘Dayê ez nêeşkena bêra, ganî şerwananê xo het de ba.’ Mi ey ra vat: ‘ Ez qurbanê to ba, to ke deqeyêk bîvîna mi rê bes o.’ Dima ame, teba rext û çeka xo virane fîşte mi ra. Mîyanê tozî de bî. Çunke teyareyanê şerî bomba varnaybî înan ser. Nêm seate ronişt vengê teqayîşêk ame. Ocalan fermandarê alaye bî, fehm kerd ke teyareyan dayo embazanê ey ra. Warişt pay ke şoro. Mi ci ra vat ‘Ti maya xo ra xatir nêwazenî?’ Ez maçî kerda û şî. 2-3 seatan ra dima demo ke waşto ke embazanê xo yê birîndaran bireyno, teyareyan dayo piro. Madeyê kîmyewî ser o varnayî.”

'Bi Çekanê Kîmyewîyan Domanê Ma Veşnayî‘

Emîra Xidire bi dejêkê pîlî vat: “bi çekanê kîmyewîyan domanê ma veşnayî. Seba ke nêzdîyê Ocalanî ba ez uca bîya. Ma bi çimanê xo dî ke cora varnayêne. Çi ke bikewtêne adirî ver, awanî bo, merdimî bê her çî veşnayêne. Domanê ma veşnayî. Çekê kîmyewî ke gurenayî zaf sîvîlî bî vîndî. Tena nêeştêne leşkeran ser, eştêne sîvîlan zî ser. Rojêke ra dima mi ra vat ke ‘Ocalan şehîd bîyo.’ Ez bi Ocalanê xo sereberz a. Rayîrê ey rayîrê şeref û namusî yo.”

'Bi Domananê Xo Sereberz a'

Kêna Emîra Xidire, Madûra serra 2013î de tewrê refanê gerîlayan bîye û serra 2018î de Gabar de, galê hewayî ra serkewte şehîd bîye. Emîra Xidire kêna xo ardê xo vîrî û vat: “Kêna mi şehîd bîye. Ez şîya zîyaretê gora aye. Mergêko bişeref bî. Ez bi înan sereberz a. Erdoganî ma keyeyanê ma ra vetîme, domanê ma kîştî, ma binê erdî de verdayî. Hîna zî zaf merdimê ma binê xirabeyanê awanîyan de yê. Kurdî çi benê wa bibê ganî paştgîrîya yewbînan bikerê, destê yewbînan vera mederê. Ganî her kes vajo ‘ez kurd a.’ Wa Erdogan mevajo ke ‘mi kurdî qedenayî.’ Ney, Ocalan tena nîyo, Ocalanî reyde bi hezaran Ocalanî estê. Wa Erdogan naye xo vîra mekero. O nêeşkeno ma biqedeno. Çîyê ke Erdoganî kerdê do ey rê memanê.”