Erebo: Vera îşxalkerîye ma asta rêxistinbîyayîşê xo berz kerde
Endama Heyetê Rayberdişî ya Kongreya Starî Hîva Erebo serebûtê serra 2019î yê Rojawanî ercnayî û vat: "Vera îşxalekrîye ma asta xo ya rêxistinîye berz kerde."
Endama Heyetê Rayberdişî ya Kongreya Starî Hîva Erebo serra 2019î hetê karanê cinîyanê Rojawanî ra ANF rê ercnaye. Erebo ard ziwan ke zor û zehmetîyanê giranan ê na serre reyde zî hêrişê îşxalî yê ke hema zî dewam kenê Kongreya Starî bi metodêkê başî karê xo kerdî û mabênê şarî de vila kerdî.
Erebo pare kerd ke vera hêrişanê dewleta tirke ya îşxalkere û cerganê aye Kongreya Starî asta xo ya rêxistinbîyayîşî berz kerde û vat: "Serra 2018î zî seba ma zehmet bî. Naye ra çarçewa armancanê ke ma seba serra 2019î dayî verê xocde hêrişanê vera Efrînî ra dima ma xîret kerd ke têkoşînê cinîyan ê Efrînî û xoverdayîşê şarî xurt bikerê. Heman wextî de karê seba agêrayîşê Efrînî armancê ma yo verên bi. Merdim eşkeno vajo Kongreya Starî astêka girînge de kar kerd. Bi xoverdayîşê Leyla Guven hêrsê cinîyan ê Rojawanî yê vera îşxalkeran û mezgê pederşahîye hem herême de hem zî dinya de zêde bîyî.
2019 de bi şîara 'Wa cinîyî bêrêxistine nêmanê' her ca de çalakîye ame kerdene. 3 menganê destpêkan ê serre de vera înkarkerdişê nasnameyê cinîye û şîdetê serê cinîyan çalakîyê cîyayî ameyî kerdene. Kongreya Starî seba rêxistinbîyayîşê cinîyanê Rojawanî dezgehanê cinîyan reyde têkilîye kerde. Seba naye herême de zaf panelî û komxebatî ameyî serûberkerdene. Waranê sîyasî, ekonomîk, dîplomatîk û perwerdeyî de zî xebatî ameyî kerdene. Kongreya Starî mîyanê karanê perwerdeyî de ca girewt. Hetê bînî ra seba xurtkerdişê rêxistinbîyayîşê cinîyan xebata xopawitişê cinîyan ameye kerdene.
Bi hezaran cinîyî akademîyan de ameyî perwerdekerdene. Zaf herêman de bi rayberîya cinîyan camêrdî zî ameyî perwerdekerdene ke no zî herême de reya verêne amebi kerdene. Çarçewa karanê xopawitişî de ma tewrê karanê asayîşî û xopawitişê cinîyan bîyî û hişmendî û xopawitişê cinîyan astêka girînge de xurt bîyî. Kongreya Starî xo warê ekonomîkî de rêxistin kerd. Serra 2019î de seba cinîyan 32 rêxistinbîyayîşê kooperatîfan ame kerdene. Kongreya Starî pêro waran de xebatanê xo dewam bikê û karê komelkî yê çend menganê peyênan seba cinîyanê ke şerî de neçare mendî ke koç bikê yenê kerdene.''
