Endamanê Eşîra Şarabîye vanê, ê do heyfê rîsipîyanê xo  Îbrahîm Mihemed El Mihêmîd, Mehmûd Mihêmîd El Xelef û cinîya ci  Tifaha El Salih bigêrê ke hetê Dewleta Tirkan û çeteyanê aye ra ameyê qetilkerdene. Eşîra Şarabîye ra Mihemed El Ebedî vat ke: "MA do hesabê qirkerdişan û hêrişanê îşxalkaran bipersê. Dezayê mi Mihêmîd Xelefî bombardûmana Dewleta Tirkan de wefat kerd. O herême de kesêko şinasnaye bi. Eşîra ma tim QSDyî reyde bîye û ma paşt da QSD. Ma do hîna zêde paşt bidê QSD û erdê xo bipawê. Ma do QSDyî reyde têbigêrê û nêverdê ke Erdogan û çeteyê ci erdê ma de bimanê."

Eşîra Şarabîye ra Endamê Meclîsê Eşîran ê Hesekî Sabid El Cevherî vat: "Ma sey Eşîra Şarabîye QSDyî rê sipas kenê ke erdê ma paweno. QSD vera îşxalkaran têkoşîn keno. Erdogan herême de qirkerdişan keno, keno ke roniştoxê herême koçber bikê û keyeyê roniştoxan talan keno. Ma do erdê xo Erdoganî rê û çeteyanê ey rê nêverdê."

Îdarekarê Meclîsê Eşîranê Heseke Ebdellah Ewad El Kundarî zî vat: "Dima ke DAÎŞ herême de ame çinkerdene, Erdoganî dest pê hêrişanê giranan kerd. Erdogan wazeno DAÎŞ ganî biko û sey raybero newe yê DAÎŞî têgêreno. Hêzê QSDyî, şar û eşîrê herême vera Erdoganî bîy yew.Ma pêro eşîrî paşt danê QSDyî. Ma do nêverdê ke Erdogan û çeteyê ey erdê ma ra parçeyêk bigêrê."