Eşîra Cîbûrî 1.50 mîlyon endamê ci Sûrîye de bi temamî 12 mîlyon endamê ci est a. Eşîra ke endamê ci Dêra Zorê ra heta sînorê Iraqî (Reqa, Hesekê, Şedadê, Hol, Til Berak û Qamişloyê) ronişenê, eşîranê tewr pîlan ê ereban ra yew a.

Serekê Meclîsê Eşîra Cîbûrî Fewaz Zûba El Mîrhemî derheqê hêrişanê dewleta tirke ya îşxalkere yê vera Rojawan û Başûrê Kurdîstanî de ANFyî rê qisey kerd. 

Fewaz Zûba El Mîrhem ard ziwan ke dewleta tirke serkêşîya Erdoganî de erdê înan îşxal kena û vat: ''Dewleta tirke sey bahane tim PKKyî sûcdar kena ke ma ney qebul nêkenê. PKK rêxistinêka xoverdayîşî ya, erdê ma pawena û xover dana. PKKyî vera DAÎŞî şer kerd û çin kerd. Dewleta tirke Efrîn, Girê Sipî û Serêkanîyê îşxal kerdî û her roje Eyn Îsa, Til Temir û Zirganî dana bombayan ver. Dewleta tirke merdimanê ma rê koçberîye ferz kenê. 

Ma binê sîwana projeyê neteweya demokratîke yê Abdullah Ocalanî de ciwîyenê, erdê xo û şarê xo îdare kenê. Seba nê projeyî erdê ma îşxal kenê. Hêrişê vera Zîndanê Hesekê zî parçeyêkê nê planê îşxalî bi. Dewleta tirke bi vatişê 'Tîya erdê ma yo' hêrişê Iraqî kena, wazena herêmanê îşxalkerdeyan de mende biba. Ma seba ney bedelê giranî dayî. Erdê ma bi bedelanê giranan ame xelisnayene û ma do erdê xo war nêverdê. Eke ma Efrîn, Serêkaniyê û Girê Spî ra fek vera bidê ma do Iraqî ra zî fek vera bidê. Ma do erdê xo de bimanê.''

Serekê Meclîsa Eşîra Cîbûrî Fewaz Zûba El Mîrhemî pare kerd ke tek hêzo ke verê îşxalê Tirkîya gêno PKK yo û vat: ''Xoverdayîşê PKKyî ma pêroyîyan paweno. Serkewtişê PKKyî serkewtişê ma yo, serkewtişê herêma ma yo. Estbîyayîşê ma pabesteyê ney o. Ez tîya ra gerîlayanê PKKyî rê vana ke ma bi zerrî û canî înan reyde yê. Ma têkoşînê înan selam kenê.''