Rojawan de wextêkî ra nata yeno xîret kerdene ke alozîyî biqewimê. Eşîranê Reqa û Tebqa meymanxaneyê Şêx Hiwedî Şilaş El Hiwedîyî de derheqê xîretan de eşkerayîyêke daye û da zanayene ke ê vera komployan hetê QSDyî de yê. 

Eşkerayîye wina ya: 

''Sûrîye wextêkî ra nata bi meydanê şerê dewletan ê mîyanneteweyîyan. QSD rixmê zaf zorîyan ronîya û îdîa keno ke Sûrîye fekê şerî ra bigêro, Sûrîye azad bikero û tede projeyê neteweyê demokratîkî awan bikero. 

Pêro şaranê Rojawanî no proje qebul kerd. Ciwanê Rojawanî tewrê QSDyî bîyî û eşîranê ereban zî sîstemê QSDyî de ca girewt. QSDyî koalîsyonê mîyanneteweyîyî reyde Rojawan kerd azad. La no serkewtiş hesabê tay kesan ra nêame û seba ke verê serkewtişî bigêrê nê kesan dest pê komployan kerd. Nê hêzanê komplogeran waşt ke bi plan û bernameyan projeyê neteweyê demokratîkî çin bikerê.

Seba naye înan hucreyî awan kerdî, nê hucreyî fînanse kerdî û kesê namdar ê komelî kerdî hedef. Nê hedefkerdişan bi qetilkerdişê şêx Beşîr El-Feysal El-Hiwêdî, Omer Elûş, Ebêd El-Xelef El-Hesan, Hevrîne Xelef dest pêkerd û bi şêx Îbrahîm Xelîl El-Hefel û Metşer Hemûd El-Hefel dewam kerd. Înan armanc kerd ke mîyanê komelî de fîrneyan vila bikerê û paştdayîşê komelî pûç bikerê. La wayûbiratîya şaran rayîr nêda nê planan.

Eqsê ci nê hêrişî îradeyê ma yê vera plan û konployan kenê zixmî. Çunke komelê Sûrîye hînî eşkeno bi xo meseleyanê xo çareser bikero.
Ma sey şêx û rayberanê eşîranê herêma Reqa paştdayîşê xo yê seba Hêzanê Sûrîyeya Demokratîke (QSD) dibare kenê. Seba xurtkerdişê yewîya ma û pawitişê destkewteyanê ma ma venga ciwanan danê ke wa tewrê QSDyî bibê. Ganî nê komplogeran ra hesab bêro persayene û planê înan bêrê eşkerakerdene. 

Ma Eşîra El-Igêdatî ra serweşîye wazenê û ma qetî kenê ma bi zerrî û canî înan reyde yê.''