9ê teşrîna verêne ya 2019î de wexto ke artêşa tirke ya îşxalkere û cerganê ci hêrişê Serêkanîyê û Girê Sipî kerd şerwanê YPG, YPJ û QSDyî destkewteyê şorişî pawitî, vera dewleta tirke ya îşxalkere û cerganê ci xoverdayîşêko tarîxî kerd.

Şerwanê YPGyî Devrîm Amedî ANFyî rê qala Xoverdayîşê Rûmetî kerde:

''Wextê hêrişan de ma kewtî rayîr. Mi têkoşînê taxa Pîşesazî ya Serêkanîyê de ca girewt ke tede pêkewtişê giranî qewimîyayêne. Artêşa tirke bi giranî hêrişê ma kerdêne. Ma bi taktîkî xo apey girewtêne û wexto ke embazan hetkarîya ma kerdêne ma reyna verê xo dayêne cephe. Taxe bi taxe ma aver şîyêne. Cergan xo tay keyeyan de xo nimitbî. Ma bi moralê hetkarîya embazan aver şîyêne, pêro astengîyî derbaz kerdêne. Ma çalakîyanê vera wesayîtanê zirxînan ra netîceyê başî girewtêne.

Wexto ke artêşa tirke averşîyayîşê ma dî reyna hêrişê cepheyê Til Xelefî kerd. Şerê tîya de mabênê ma û înan de 20-25 metreyî estbîyî. Ez o çax birîndar bîya, erdî ser o qeldîyaye bîya. Mabenê mi û cerganê artêşa tirke de qasê 10 metreyî estbîyî. Tam o çax embazêka cinîye guleyî eştî cergan ser û milê mi ra girewt, ez kaş kerda. O çax kîloyê mi zêde bi qasê 85-90 kîlo bi. Mi dî ke embaza cinîye ez girewta paştîya xo, ma kuçe ra derbaz bîyî. O çax cergan reyna guleyî eştî ma ser û embaza cinîye birîndar bîye.

Embazan waştêne ma warê şerî ra dûrî bigêrê. Ma ver bi wesayîtî kewtî rayîr. Tam o wext guleyêko bîn kewt paştê mi. Ez gina erd. Embazan ez berz kerda. Hêdî hêdî hîşê mi şi. Peynî de embazan ez warê şerî ra veta û resnaya nêweşxaneyî. Bi nê hawayî ez ciwîyaya.

Xoverdayîşê Rûmetî de reyna mi şahîdîya îradeyê embazan ê cinîyan kerde. Ez pê ney mat menda.  Wexto ke ez agêra tugayê xo embazan ra pers kerd ke kame ez xelisnaya. Mi vat embazêka cinîye ez xelisnaya. Têkoşîn de ez 3 reyî birîndar bîya, 2 reyî embazanê cinîyan ez xelisnaya. Fedakarîya înan ra nêba ewro ez nêciwîyayêne.

Ez cuya xo deyndarê Rayber Apoyî, şehîdan û embazan ê cinîyan a. Semedê embazanê YPJyî se vaja bes nîyo. Ê wayîrê vîrameyîşanê embazanê xo vejîyenê.''