Wekîla DEM Partî Gulcane Kiliç Sayyîgît derheqê Konferansê Tewirî yê Rojawanî yê Kurdan o Neteweyî de ajansê ma rê qisey kerd.

Gulcane ard ziwan ke modelê Rojawanî her hetî ra dinya rê mîsal o û no model hûrmetê hesasîyetê merdiman û cuyêka azade keno. Gulcane derheqê armancê beşdarîya xo ya bi konferansî de wina vat: ‘’Seke şima zî zanenê Birêz Ocalanî de ancî pêvînayîşî yenê kerdene û nê pêvînayîşan de Birêz Ocalanî vat ke o amade yo ke meseleya kurdan çareser bikero. 27ê sibate de zî Birêz Ocalanî ‘Vengdayîşê Haştîye û Komelê Demokratîkî’ kerd. DEM Partî çarçewa nê vengdayîşî de qasê 100 kombîyayîşî kerdî û şarî rê qalê vengdayîşî kerd. Ancî ma Başûr û Vakurê Kurdîstanî de pêvînayîşî kerdî. Ma ameyî Rojawanî zî û raştê nê konferansî ameyî.’’

Gulcane derheqê netîceyanê konferansî yê serê meseleya kurdan de wina vat: ‘’No konferans konferansêko tarîxî yo. Rojawan serkêşîya yewîye keno. Netîceyê nê konferansî do qetî tesîrê pêro parçeyanê Kurdîstanî bikerê. Nêbeno ke şarê kurdî serrêke zî vinî bikero. Sînorê viraşteyî do kurdan rê nêbê asteng.’’

Gulcane îfade kerd ke hinî nêzdîbîyayîşê Tirkîya verê Rojawanî de ganî bivurîyo û vat: ‘’Eke ewro kurdê mîyanê Tirkîya haştîye ser o qisey kenê ganî kurdê pêro dinya haştîye ser o qisey bikerê. Eke Tirkîya kurdanê Vakurî zî pêbikera ganî kurdanê parçeyanê bînan rê dişmenîye nêkera. Ganî Tirkîya hinî verê Îdareyê Xoserî de nêzdîbîyayîşê xo bivurna. 

Gulcane pare kerd ke Konferanso Neteweyî do bikero ke statuyê Îdareyê Xoserî yê Rojawanî bişinasîyo û vat: ‘’Modelê Îdareyê Xoserî hetê her kesî ra yeno teqîbkerdene. Konferansê Rojawanî seba pêro parçeyanê Kurdîstanî do bibo destpêkê gamanê girîngan. Konferansî ra hetê huqûqî ra û hetê sîyasî ra Şam de pêvînayîşî do bêrê kerdene. Nê zî bikerê ke îdareyo Xoser do bişinasîyo.’’

Peynîya qiseykerdişê xo de Gulcane mesajêko winayên da dormeyanê sîyasîyan: ‘’Sey Vakurî ma tim têkoşînê Rojawanî dûrî ra teqîb kerd. La hertim ma heyranê nê têkoşînî bîyî. Çîyêko ercîyaye yo ke ewro tîya de ma nê hîsan ciwîyenê. Ganî hinî berê sînorî bêrê akerdene. Yanî hinî dewleta tirke ganî na babete de gamanê hewceyan bierza. Çunke kurdî qetî têkoşînê xo ra fek vera nêdanê. Eke Tirkîya kurdanê zereyê xo bişinasna ganî kurdanê parçeyanê bînan zî bişinasna. No bi Tirkîya bido qezençkerdene. Ez kêfweş a ke bîya şahîda nê konferansî.’’