Hemsereka Federasyonê Gazîyan  ê Rojawanî Fatma Omera ke 2014 de Hesekê de şer de yew polê ci tira vejîya, ANFyî rê qisey kerd û îfade kerd ke Têgêrayîşê Azadîye yê Kurdan komelêko ke verê mergî de bibi, newe ra ard xo ser.

Fatma da zanayene ke wexto ke Rojawan de şerêko giran qewimîyayêne 2013 de a zî tewra YPJyî bîya. Fatma vat: ''Mi erdê xo ra zaf hes kerdêne, coka ez nêeşkayêne tira fek vera bida. Înanê ke hêrişê erdê ma kerdêne waştêne merdiman çin bikerê. Vera ney herinda teriknayîşê welatî de oyo raşt pawitişê welat û neteweya xo bi.''

Fatma bale ante ser ke dima ke Rayberê Şarê Kurdî Abdullah Ocalanî şîyo Rojawan keyeyê aye bi tesîrê fikranê ci bîyo Apogîr. Fatma vat: ''Embazî tim ameyêne. Mi verî nînan ra yew gerîlaya cinîye dîye. Ez o çax zaf qij bîya la aye zaf bala mi ante. A rixmê tedaya rejîmî zî bi sereyê xo amebî hetê ma. Aye tim eleqe mojnayêne domanan, ma de qisey kerdêne. O çax mi rê zaf manadar ame ke cinîyêke dest erzena çeke, bi sereyê xo têgêrena û mîyanê komelî de sey ercîyaye qebul bena. 

Mîyanê nê serebûtan de mi raştîya şarê xo dîye. Bi taybetî sey cinîyêke mi fam kerd ke cuye senî hîna manadar bena. Têgêrayîşê Azadîye reyde mi manaya cuye zêdêr fam kerde. Hemleya Rayber Apoyî û Têgêrayîşê Azadîye reyde kurdî û Kurdîstan newe ra aferîyayî. Têgêrayîşê Azadîye şorişêko winasên kerd ke pêro dinya ra vila bi. No şoreş têna şorişê kurdan nêbi. Têgêrayîşê Azadîye ho keweno serra 50 û vera vila beno, newe beno. Têgêrayîşê Azadîye yê Kurdan komelêko ke verê mergî de bibi, newe ra ard xo ser.''