Şerwanê Meclîsê Leşkerî yê Minbicî, YPJ, YPG û QSDyî vera hêrişanê îşxalî yê dewleta tirke û çeteyanê ci yê SMOyî Tişrîn de bi rûhê serkewtişî xo ver danê. Fermandaranê QSDyî Nîdal Egîdo ke şaristanê Humusî yê Sûrîye ra yo ajansê ma rê qalê xoverdayîşê Tişrînî kerd. 

Nîgal Egîdî ard ziwan ke o seba pawitişê erd û şarê xo tewrê QSDyî bîyo û vat: ''16 rojî yo dormeyê Minbicî û Awbendê Tişrînî de xoverdayîşêko tarîxî yeno kerdene. Çimeyê hêzê nê xoverdayîşî moral û coşê refanê QSDyî ra yenê. Heta nika xeylê çeteyî ameyî kiştene, wesayîtê zirxinî ameyî îmhakerdene. Heta ke çeteyî erdê ma ra bêrê pakîkerdene xoverdayîşê ma do dewam bikero.

Êyê ke wazenê erd, welat û şarê xo bipawê ganî tewrê nê xoverdayîşî bibê. Çeteyî û dewleta tirke dişmenê şaran ê. Coka tek armancê înan çinkerdişê şaran o. Ganî vera hêrişanê îmhayan seferberîya topyekûne bêra îlankerdene. Sey şerwananê QSDyî ma do apey game nêerzê. Sere de ciwanî ganî pêro kesî nê xoverdayîşê tarîxî de cabigêrê.''