Fermandarê Pêroyî yê Hêzanê Sûrîyeya Demokratîke (QSD) Mazlûm Ebdîyî hesabê xo yê twitterî de derheqê hêrişanê îşxalî yê dewleta tirke de eşkerayîyêke daye.

Ebdîyî vat: ''Dewleta tirke herêmanê ma yê asayîyan dana bombayan ver û no çi faydeyê qet yew partîye nêkeno. Seba ke mebê sebebê felaketêkê pîlî ma bi her hawayî xîret kenê la eke şer vejîyo netîceyê ci do tesîrê her kesî bikera. Hêrişî hînî têna bi herêmanê bombakerdeyan sînordar nêmanê. Wa şarê ma keyeyanê xo de bimano û goreyê dîrektîfanê hêzanê ma yê asayîşî têbigêro.''

Mazlûm Ebdîyî dima Ronahî TVyî rê zî qisey kerd û da zanayene ke teyarayê şerî yê dewleta tike şewe ra nata Şehba ra heta Dêrikî xeylêk cayanê Rojawanî danê bombayan ver.

Ebdîyî vat: ''Ne hêrişan de noqtayê ma yê leşkerî zî wareyê sivîlan zî dîyenê bombayan ver. Hêzê rejîmê Sûrîye zî, hêzê ma zî dîyayî bombayan ver. Tay şehîd û birîndarê ma  est ê. Goreyê agahîyanê ke ma girewtê, hêrişî do dewam bikerê. Eşkera yo ke yew eleqeyê ma yê bi hêrişê Taksîmî çin o. Pêro dinya naye zanena. No hêrişê karê MÎTî bi. Dewleta tirke pê nê hêrişî wazena şarê ma sûcdar bikera. Dewleta tirke no hêrişê Taksîmî xo rê kerd bahane.

Dewleta tirke wazena Rojawanî veng bikera û qesas bigêra. Erdogan zî bi nê hawayî wazeno weçînayîşan de ser bikewo. Nê hêrişî do îradeyê ma meşiknê. Eke dewleta tirke nê hêrişan rê dewam bikera her kes do zerar bivîno. Ma şerî nêwazenê. La eke dewleta tirke şer de israr bikera ma zî do xo ver bidê û her kes binê tesîrê nê şerî de bimano. Ma venga her kesî danê ke hêrişanê dewleta tirke vindarno. 

Goreyê agahîyan bombardumanî do wextêk dewam bikerê. Nika serê erdî de têgêrayîşêkê artêşa tirke çin o. Ma zî tedbîrê xo girewtî. Şar seba ke zerar mevîno wa goreyê dîrektîfanê ma têbigêro.''