Fermandarê Pêroyî yê QSDyî Mazlûm Ebdîyî cewab da persanê ANHA. Ebdîyî sere de xîretê dîyaloganê dewleta tirke yê bi rejîmê Şamî hêrişê îşxalî yê dewleta tirke û rewşa xoverdayîşê Rojawanî ercnayî.

Qiseykerdişê Ebdîyî ra tay noqtayê girîngî wina yê:

''Nika dewleta tirke xîret kena ke rejîmê Sûrîye de pêbikera. La rejîmê Sûrîye wazeno ke dewleta tirke waranê îşxalkerdeyan ra bi hêzanê xo û cerganê xo vejîya. Rejîmê Şamî vera ma şerêkê neheqî keno. Dewleta tirke cara wazena Îdareyê Xoserî çin bikera. Rejîmê Şamî vera şarê ma ambargoyêkê giranî kena. Herêmanê Îdareyê Xoserî de rejîm şarî bê îmkanan verdeno.

Sûrîye de bê Îdareyê Xoserî çareserîye do mumkîn nêba. Serra verê ma de ma do plan û projeyanê hîna bitesîran virazê û hîna aver şorê. Dewleta tirke û rejîmê Şamî statu û estbîyayîşê şarê kurdî qebul nêkenê. Her kes de dîyalogê ma est ê. Mesele nêşinasîyayîşê statuyê ma yo. Hinî mumkîn nîyo ke şarê kurdî do abigêro rewşa verê 12 serran.

Rejîmê Şamî Tirkîya ra wazeno ke destek nêda komanê sey Îhvani Muslîmîn, cerganê Îdlîb, Efrîn û Serêkanîyê. Rejîmî nê 12 serran de xeylêk hêzî kerdî dişmenê xo. Tirkîya zî nê hêzî Îdlîb de ardî pêser û nika zî nînan bena Efrînî. Tirkîya nêwazena nînan bera Tirkîya, rayaumûmîya Tirkîya zî ney nêwazena. Rejîmê Sûrîye zî nînan qebul nêkeno. Yanî mesele zaf xorin a û wextêkê kilmî de do çareser nêba.

Ma 12 serrî yo kenê ke rejîmê Sûrîye de dîyalogan bikerê û çareserîyêke virazê. Rejîmê Sûrîye wazeno ke abigêra rewşa verê serra 2011î.  Seke mi vat no mumkîn nîyo. Eke rejîm Îdareyê Xoserî û kurdan de pêbikero aramîye do bêra Sûrîye.

Ma amade yê ke pêro terefan de dîyalogan virazê. Seba ney şertê ma zî no yo ke ganî cade îşxal biqedo. Wa Tirkîya îxalê xo yê Efrîn, Girê Sipî û Serêkanîyê biqeda. Dewleta tirke nika zî Rojawan de û Herêmanê Pawitişî yê Medya de hêrişê kurdan kena.

QSD û şarê ma nê 12 serrî bi xoverdayîşî derbaz kerdî. Serrnê zî ma do wina xo ver bidê. Ganî serra 13ine do biba serra çareserîye. Ez bawer a ke ma do bi xurtî hîna aver şorê. Beşo zehmet qedîya; wa şarê ma hinî nêkewo rayîrê koçberîye. Şorişê ma ney heq nêkeno. Rixmê kêmasîyan zî ma dest bidê destî û pîya aver şorê.''