Endama Konseya Hemserekîya PYDyî Foza Yûsif derheqê krîzê Sûrîye, rewşa Îdareyê Xoserî de cewab da persanê ANFyî.

Rewşa ke sey meseleya Sûrîye, krîzê Sûrîye pênase bena, çita ya?

Rewşa ke tira meseleya Sûrîye vajîyena, meseleya pêro dewletanê herêm a. Sûrîye seba ke dewleta neteweyîye bîya krîzî de têrî bîya û parçe bîya. Sûrîye şarê xo yê bînî kurdî, sûryanî înkar kerdî. Naye ra meseleyê sîyasî û bawerî qewimîyayî. 2011 de vera nê sîstemê netewa dewlete acizîyêka pîle qewimîyaye. Coka meseleya bingeyî ya Sûrîye netewa dewlete û nêbîyayîşê sîstemêkê demokratîkî yo.

Yeno vatene ke destpêkê na rewşe 2011 o. Qey verê cû meseleyêka Sûrîye çin bîye?

2011 ra verî zî sey sîyasetê nîjadperestî yê vera Rojawanê Kurdîstanî, sîyasetê mezhebî û dînî û sîyasetê netewa dewlete meseleyî est bîyî. Dima ke Wisarê Ereban dest pêkerd netewa dewlete ya Sûrîye zî îflas kerd. 2011 de Deraa de serewedaritişê verênî qewimîyayî. Çunke şar hînî aciz bibi, waştişê şarî zaf bîyî. Şarî dîyalogî, têdûştî, edalet, azadîye waştêne. Kurdan waştêne ke nasnameyê înan nêro înkarkerdene. Ereban demokrasî, ekonomîya rinde waştêne. Yanî şarî vurîyayîş waştêne.

Serebûtanê 2011î ra heta ewroyî texrîbat senîn o?

12 serran de krîzî bîyî sebebê dej û xerakerdişî; bi mîlyonan merdiman koç kerd, bi se hezaran merdimî kişîyayî û birîndar bîyî. Binawanîya Sûrîye îmha bîye. Şerê vera DAÎŞî zî zaf tesîrê xirabî kerd. Xizanîye zêdîyaye. 12 serrî yo şarê Sûrîye nê meseleyan de têrî yê û nê meseleyî vera pîlêr benê.

Kam û kamyew hêz daxîlê na rewşe bîyî? Çita bi sebebê mudaxeleyanê teberî?

Seba ke hukmatê Sûrîye vera şarî şîdet şuxilna mudaxeleya teberî qewimîyaye. Hêzanê teberî goreyê menfaetanê xo mudaxele kerd. Tirkîya  bi destê Cebhet El Nûsra û cerganê bînan mudaxele kerd. DAÎŞî ra dima hêzanê Koalîsyonî mudaxele kerd, 2015 ra dima Rûsya mudaxe kerd. Yanî 2015 ra dima meseleya Sûrîye hînî bîye meseleya globale. Sebebê pîlbîyayîşê meseleya Sûrîye hukmatê Şamî û hêzê mîyanneteweyî yê. Îdareyê Xoserî tim seba çareserkerdişê mesele xîret kerd la çewî qîmet nêda ney. Îdareyo Xoser daxîlê platformanê mîyanneteweyîyan nêame kerdene. Coka seba çareserîye îrade û hêzê Sûrîye zî nêvejîyayî werte. Hêzanê mîyanneteweyîyan zî seba menfaetanê xo qetî nêwaşt mesele û krîzê Sûrîye çareser bikerê. Coka pêvînayîşanê Cenevre, Astane, Soçî ûsn de çareserîyêke pêşkêş nêbîye. 

Îdareyê Xoserî seba çareserîya mesele senî kede daye?

Îdareyê Xoserî înîsîyatîfê çareserîye aver berd. Se ra 30ê şarê Sûrîye ewro binê sîwana Îdareyê Xoserî de yê. Îdareyo Xoser wayîrê înîsîyatîfê çareserîye, îradeyê sîyasî û leşkerî yo. Îdareyo Xoser çareserîya mesele de tim îradeyê şarî rê giranîye dano. Îdareyê Xoserî modelê xo yê îdareyî vet werte la no îdare ame peygoşkerdene. Heta ke Îdareyo Xoser tede çin bo qet yew mesele çareser nêbena. Adresê çareserîye Îdareyo Xoser o. Modelê Îdareyê Xoserî ra ber modelêk çin o ke cewab bido waştişanê şarê Sûrîye.''