Endama Komîteya Hemserekîye ya PYDyî Foza Yûsif cewab da persanê ANFyî. 

Foza Yûsif bale ante qirkerdişê elewîyan ser û pare kerd ke HTŞ demokratîk nîyo. Foza vat: ‘’Eke HTŞ wina dewam bikero aqîbetê ci do bibo sey ê Baasî. Ma no xeylê platforman de ard ziwanî. Qanûno Bingeyî yo ke HTŞyî îlan kerdo îradeyê şaran çin hesibneno. Gamê HTŞyî yê ke heta nika eştê mojnenê ke o hem hetê pratîkî ra hem zî hetê ferasetî ra rejîmê Baasî ra cîya nîyo.’’

Foza da zanayene ke armancê înan o tewr pîl no yo ke şarê Efrîn, Girê Sipî û Serêkanîyê bi asayî waranê xo de ancî cabibo. Foza vat: ‘’Hema zî nê cayanê îşxalkerdeyan de çeteyê dewleta tirke est ê. Şertê ma yo ke wa dewleta tirke û çeteyê ci nê cayan ra vehîyê. Babeta asayîşê şarî babeta ma ya esas a. ‘’

Foza dîyar kerd ke qirkerdişê vera elewîyan bi xirabî tesîrê temamîya Sûrîye kerdo û vat: ‘’Ma vera nê qirkerdişî bi zelalî tewirê xo eşkera kerd. Seba vindarnayîşê nê qirkerdişî zî xîretê ma dewam kenê. Mesuldarîya hukmatê Şamî caardişê asayîşê merdiman o, qirkerdişê şrî ney. Ganî qirkeran ra hesab bipersîyo. Ma do hetê huqûqî ra na rewşe teqîb bikerê.’’

Foza îfade kerd ke dewleta tirke 2011 ra nata Sûrîye de sebebê krîzan a û vat: ‘’Tirkîya dişmena Şorişê Rojawanî ya. Eke meseleya kurdanê Vakurê Kurdîstanî çareser biba na rewşe do tesîrê têkilîyanê Tirkîya û Rojawanî zî bikera. Proseso ke bi vengdayîşê Rayber Apoyî dest pêkerdo eke ser bikewo Sûrîye de zî rewşêka pozîtîfe seba çareserîye do vejîya werte.’’