Goreyê xebera JinNewsî xeberê derhaqê xebitnayîşanê çekan ê qedexekerdeyan ê hetê Tirkîya ra herême ra yenê. Rojnamegeranê ke hêrişanê Girê Sipî û Serêkanîyê de ca yê ci de taqîb kenê, da zanayene ke 9’ê Teşrîna Verêne ra nata Dewleta Tirkî hêrişanê bi hawan, top, obusan û teyarayanê şerî ra ber çekanê kîmyewî xî xebitnena. Endama Heyetê Rayberdişî ya TEV-Dem’î Foza Yûsife veng da ke heyetêko xoser ê doktoran, yan zî doktoranê ke hetê Rêxistina Weşîye ya Dinya (WHO) ra yeno meydan herême de cigêrayîş biko û sucê şerî tesbît bikê.

Dimayo ke JinNews û ANHA dîmenê sivîlanê ke bedene înan ameyî vêşnayene, dîmenê neweyî zî peyda bîyî. Dîmenan de ke rojnameger Nazim Daştanî antî, yenê dîyene ke merkezê şaristanê Girê Sipî û dewanê ey de dûyêko sipî berz beno. Nazimî 13’ê Teşrîna Verêne de Girê Sipî de dîmenî antî ke dîmen de aseno ke wareyê sivîlan de teqayîşêko pîl ame meydan. Daştanî vat, “Reya awile mi dûyêko sipî yan zî medeyêka sipîye dîye. Dimayê bombardûmane wexto ke ma şîyê merkeze şaristanî mi dî ke sivîlêk vêşeno û bîyo wel.”Muxabire Rûken Cemale zî destpêkê hêrişan ra nata Serêkanîyê de yê, pare kerd ke 9’ê Teşrîna Verêne ra nata seba ke xoverdayîşê Serêkanîyê çin bikê her tewir çekî yenê xebitnayene û vat, “Saetêk de bi seyan top û hawan, roket û teyarayanê şerî hêrişan kenê. Çekê ke yenê xebitnayene çekê kîmyewî yê.”

Endama Heyetê Rayberdişî yê TEV-DEM’î Foza Yûsife ard ziwan ke doktoranê ke înan reyde yê, derheqê çekanê qedexekerdeyan de cigêrayîş kenê û ê do netîceyê sey yew wezîfeyê neteweyî parbe bikê.Yûsife vat ke ganî doktorê bêsînorî, rêxistina weşîye ya dinya û pisporê na babete derheqê çekanê ke ameyî xebitnayene de cigêrayîşan bikê û deste doktoran û Heyva Sor de doneyê cidî estê. Yûsifî vat, “Ganî pêroyê dinya bivîne ke Serekkomarê Tirkîya Tayyîp Erdoganî senî nê cayan de qirkerdişî kerdî.” Yûsife bale ante ke seba ke xoverdayîş bêro çinkerdene çekê qedexekerdeyî yenê xebitnayene û vat doktoran derheqê nê sucanê şerî de raporî amade kerdî.

Rêxistina Efûyî ya Mîyanneteweyî zî verê cû pare kerdibi ke ‘doneyê xurtî’ estê ke mojnenêTirkîya û komanê aye sucê şerî kerdî.