Hetkara Hemserekê Meclîsê Rayberdişî ya Îdareyê Xoserî yê Demokratîkî yê Vakur û Rojhelatê Surîye Elîzabet Eysa Gewrîye hêrişê dewleta tirkî yê Rojawanî ser o ANFyî rê qisey kerd.

Gewrîye vist vîrî ke Surîye de krîz û şer kewtî serra 8ine û va: ‘‘Ma roja  verêne ra cayê şarî de ca gênî. Ma îdareyê xoserî ke heqê pêroyê şar û îtîqatan pawenî awan kerdî. Serra 2014î de wexto ke ma îdareyê xoserî awan kerdî ma way-biratîya şaran û edaletê komelî esas girewtî.‘‘

SEMEDÊ SÛRÎYEYA KE NEWE Û DEMOKRATÎKE

Gewrîye wina dewam kerde: ‘‘Vakurê Sûrîye xeyrê şerwananê ke bedelê girdî dayî û fikir û hêrişanê tarîyan ra pawitî payra mend.  Bi nê mucadeleyê girdî ma Îdareyê Xoserî yê Demokratîkî rona. No îdare semedê letekerdişî nê semedê Sûrîyeya ke neweye û demokratîke ame ronayene.‘‘

Gewrîye ard ziwan ke projeyê înan o demokratîk zorê Tirkîya şino û best pa: ‘‘AKP  Îttîhat û Terakkîyo ke sûryanî û ermenî qetil kerdî dewamê înan o. AKP bi taybetî zî wazeno ke Seyfoyê 1915î pey ser biyaro.  Xeta Efrîn, Bab û Cerablusî de qetlîam kerd û şar cayê ci ra kerd. Wazenê ke tîya de demografî bibedilnî. Erdogan  wazeno ke herême de bi şerêko gird ereb, kurd, sûryanî, tirkmen, ermenî û çerkezan qetil bikero û Vakurê Sûrîye ra vejo.‘‘

ERDOGAN HÊRIŞÊ PROJEYÊ MA KENO

Gewrîye qiseykerdişê xo rê wina dewam kerd: ‘‘ Heta nika hêzanê ma cayê peyênî ke DAÎŞ tede mendo zî şer kerdêne. Rixmê naye Erdogan hêrişê proje û hêzanê ma keno. Hêrişê Serêkanîyê, Kobanê û Girê Spîyî keno. Wazeno ke zîhnîyetê xo yê faşîsîtî tîya de, herra ma de ca bikero. Bi nê hêrişan paşt dano terorê DAÎŞÎ.‘‘

Gewrîye qiseykeridşê xo wina qedîna: ‘‘Eşkerayo ke Sûrîye de krîz bi şerî nêno çareserkerdene. Semedê qedînayîşê şerî ganî Yewîya Mîletan bikewo dewre. Şarê ma zaf dej ant. Ma wazenê ke Sûrîyeya demokratîke awan bikerê. Şar û herrê ma layiqê naye yê. Tarîxî de herra  Sûrîye cayê zanayîşî bî û herfê verênî na herre de îcat bîyî.‘‘

ELÎZABET GEWRÎYE KAM A?

Maya 3 domanan Elîzabet Gewrîye 28 serrî malimîye kerda.  Semedê pawitişê ziwanê suryankî xebatê erjayeyî kerdî. Elîzabet Gewrîye serra 2005 ra nata dîplomasîya şaran kena û serra 2014î nata zî rayberîya Îdareyanê Xoserî yê Demokratîkî yê Rojawanî kena.