Verba hêriş û tehdîtanê îşxalî yê dewleta Tirkî  yê serê Vakur û Rojakewtêna Surîye Girê Sipî de rayşîyayîşêk ame viraştene.

Meclîsê Kantonê  Girê Sipî vizêr seba serrgêra 5'îne yê hêrişê çeteyanê DAÎŞ'î yê vera Kobane rayşîyayîşêko  pîl organîze kerd. Bi hezaran kesî Taxa El-îskane de pê fotografanê şehîdan û pankartan verba îşxalkerdişî rayra şîyî. Rayşîyayîşî de xoverdayîşê Kobane û Efrînî bi sloganan amayî silamkerdene. Rayşîyayîş çatrayîrê şaredarî de vurîya mîtîngî. Mîtîngî de Hetkarê Hemserekîya Meclîsê Kantonê Girê Sipî Sebrî Mistefa qisey kerd û wina va: "Dewleta Tirkî wazena krîzê Sûrîye bivurna firsend û işxalkerîya Osmanîyan newe ra saz bika. Reyna wazena îradeyê hemparî yê Vakur û Rojakewtena Surîye çin bika." Sermîyana Partîya Amayoxe ya Sûrîye Fatîma Şeban zî qisey kerd, xoverdayîşê Kobane û Efrînî silam kerd. Sermîyana Kongreya Stare Hûda Mistefa zî eşkere kerd ke heta peynîya terorê înan, do têkoşînê xo rê dewam bikê. Çalakîye pê sloganan qedîyaye.