Fermandaranê Yewînanê Anî-Terorî (YAT) ra Gulbihare Çîya 'Operayonê Asayîş û Merdimîye' yê Kampa Holî ANFyî rê ercna. Operasyonî 28ê adare de dest pêkerd. Hêzê QSD, YAT, YPG, YPJ û Koalîsyonê Mîyanneteweyî operasyon de ca gênê. Safhaya yewîne ya operasyonî 2ê nîsane de qedîyaye. Operasyon de 125 cergî, 20 payeberzî û 15 cinîyê cergî tepişîyayî.

Gulbihare da zanayene ke ê armanc kenê ke tehlukeyê DAÎŞî bi temamî herême de biqedînê. Gulbihare pare kerd ke Kampa Holî de bi taybetî cinîyê DAÎŞijî zaf aktîf ê. Gulbihare vat: ''Kampa Holî de cinîyî pê destê cinîyan kişîyenê û domanî hîşmendîya DAÎŞî rê yenê qurbankerdene. Heta ke ma asayîşê nê cinî û domanan nêyarê ca ma do nêvinderê. Bingeyê operasyonê ma no yo. Eke cinî û domanî nêpawîyê DAÎŞ newe ra xo rêxistin keno û pêro dinya rê beno tehluke.''

Gulbihare eşkera kerd ke 57 welatê ke hemwelatîyê înan ê DAÎŞijî Kampa Holî de yê vera mesele bêveng ê û vat: ''Nê welatî ganî na bêvengîye war verdê. Hema zî pêro dinya de tehlukeyê DAÎŞî dewam keno. Ganî nê welatî mesuldarîyanê xo bîyarê ca û paştî bidê ma. Nê wextî de Kampa Holî de xeylêk qirkerdişî qewimîyayî. Ma pê bawer ê ke do hîşmendîya Kampa Holî pakî bikerê.''

Fermandare Gulbihare Çîya peynîya qiseykerdişê xo de bale ante ser ke ê pêro dinya tehlukeyê DAÎŞî ra pawenê û wina vat: ''Çimê pêro cinîyanê herême û dinya rayîrê ma de yê ke ma bieşkê terorê DAÎŞî ra înan bipawê. Ma goreyê mesuldarîyanê xo têgêrenê. Operasyonê Asayîş û Merdimîye de ma xeylêk cergê je fikrê DAÎŞî mîyanê doman û cinîyan de vila kerdêne tepiştî. No zî keno ke Kampa Holî heta astêke tehlukeyê DAÎŞî ra xo bixelisna. Heta ke na kampe de cinîyî bêrê qetilkerdene ma do şewe û roje vera nê terorî şer bikerê.''