Kampa Holî ya ke merdimê ke Sûrîye û Irqaq ra rîyê şerî remayî tede menanî,kapasîteyê ci 40 hezar kes bo zî, hûmara merdimanê nika qamp de resaya 51 hezarî. Kampa Holî ya ke sînorê Surîye-Iraqî de ya hetê hîratîye ra zî, hetê peydakerdişê hewcedarîye zî îmkanê ci kêm ê. La rixmê naye zî hûmara bextwaştoxan kampe de her ke şina zêde bena. Dimayê beşêko gird ê dewa Baxozî yê herêma Hecînî hetê hêzê QSD'yî ra ame xelisnayene, hemser û domanê çeteyanê DAÎŞ’î zî kampe de ameyî cakerdene û  beşêko ke seba înan ameyo birnayene vindeno.

Hemsereka Rayberîya Kampanê Kantonê Heseke yê Rayberîya Xoserîya Demokratîkî ya Vakûr û Rojhelatê Surîye Macîde Emîne ard ziwan ke timî merdimê neweyî yenê, coka ê nêeşkenê hûmara peyêne tespît bikerê. Heta nika 2100 zêdeyî cinîyê ke 49 welatanê cîyayan ra ameyê û zereyê sîstemê DAÎŞ'î de cagirewto domananê xo reyde kamp de sey bextwaştoxan manenê. Emîne da zanayene ke, rixmê hetkarîya tayê sazgehanê mîyanneteweyî û Heyva Sor (Aşma Sure) zî, kamp de problemê stargehî, werdî, şimitişî û  weşîye zêde yê û bi nameyê xoserîya demokratîke ê wazenê şert û mercanê cuye ya merdimî baştir bikerê, la hêzê înan nêşono naye û seba hetkarîye vengdayîş kerd.

HÛMARE RESAYE 51 HEZARÎ

Derheqê kapasîteyê kampe  de Emîne vat, “Destpêkerdişê şerê Musilî de verê bextwaştoxê Iraqî ameyî. Hûmara merdimanê kampe vejîyaye serê 30 hezar kesî. Dimayê başbîyayîşê rewşa Iraqî, beşê înan apey gêrayî. Labelê nêzdî 7 hezar bextwaştoxê Iraqî û 2500 bextwaştoxê Surîye kamp de mendî. Bado Hemleya Hecînî dest pê kerd, nêzdîyê 42 hezar merdimê bînî ameyî. Hûmara merdimanê  kampe nika 51 hezar derbaz kerdo. Kampe de 5 beşî estê û kamp wareyê 8 kîlometreyî ser o ameyo awnkerdene. Kapasîteyê ci tewr zêde 40 hezar o. Ma beşê 6’ine zî akerd. No beş nêzdîyê 40 hezar hîra yo. Nêzdîyê 10-12 hezar bextwaştoxî dekewtî ci.

KEYEYÊ DAÎŞ’Î BEŞÊ CÎYAYÎ DE MANENÊ

Emîne da zanayene, peynîya Hemleya Reqa û destpêkerdişê Hemleya Dêrazorî hemser û domanê çeteyanê DAÎŞ’î kampan de ameyî cakerdene û vat, “Seba ke Kampa Rojî de ca nêmend, ma seba keyeyanê çeteyanê DAÎŞ’î Kampa Holî de ca akerd. Destpêkerdiş de hûmara înan kêm bîye, la dimayê Hemleya Hecînî dest pê kerd hûmare zêde bîye.

Cayê keyeyanê DAÎŞ’î kampe de cîya yo. Ma înan bextwaştoxan reyde eynî cayan de ca nêkenê. Seba ke ê û bextwaştoxî pêserê nêkenê. Seba ke zextê bextwaştoxan bînan nêkerê, ma ê cîya ca kerdî. Hetê hetkarîya merdimî ra, hewcedarî, weşîye û her babete de ma senî nêzdîyê merdiman ê bînan benê, bi eynî rengî nêzdîyê keyeyanê DAÎŞ zî benê.’’

REJÎM BI ZANAYÎŞ PROBLEMAN VEJENO

Emîne bale ante tengayîya ke ancene ser û va: ’’Rasta zî ma zaf zehmetî antî. Hûmara bextwaştoxan serê hêzê ma de ya. Hewcadarîya ma bi xeyman, cilan, werdişê rojane û awe esta. Sazgehê bingeyênî yê babeta kampan de hetkarîya kenê Rayberîya Xoserîya Demokrate û UNCR o. Xeyman û seba rekewtişî cilan danê şarî. Rêxistina hetkarîya Blomentî zî babeta hewcadarîya rojane de hetkarîye kena. La seba ke ruxset rejîmî ra girewto, zehmetî vejîyenê. Rejîm bi zanayîş destûran erey dano. Menga 21’ine de wexto ke hemleye dest pê kerd, mabênê sazgehanê hetkarî û rejîmî de persêk vejîya. O wext ma zaf zehmetîye ante. Şar xeymanê girdan de, cayanê sazgehan ê hetkarîye û wendegehan ê kampe de mend. Bado perse çareser bîye û tayê hetkarîye ameye.

HETKARÎYÊ KE YENÊ BES NÎYÊ

Emîne vat rixmê xebitîyayîşê tayê sazgehanê Kurdî û mîyanneteweyîyan zî hîna hetkarîyê ke yenê bes nîyê û dewam kerd, “Hîna zî ma zaf zehmet ancênê, hetkarîye kêm a. Sazgehê hetkarîye nêeşkenê xeymanê qijan bidê. No semed ra xeymanê girdan de şar pîya ciwîyeno. Xeymî reyna zaf kêm ê. Babeta de weşîye de sazgehê serekê ke xebatan kenê Heyva Sor a. Barê nê sazgehî zî rast zî giran o. Sazgehê bînî zêde hetkarîye nêkenê. Kampe de domanî, cinî û kokimî estê û zaf nêweşî zî mabenê înan de estê. Ma na babete de zaf çetinîye ancênê. Kampa ke nêzdîyê 51 hezar merdim tede manenê, xizmetê weşîye teyna vileyê Heyva Sore de mendo.’’

Kampa Holî de rojane de bi 5 traktoran 20 hezar ton yeno wedartene. La wexto ke zereyê kampe de bigêrê her ca de hîna zî çop yeno dîyayene  û no kamerayan de zî aseno. Wexto ke ma na babete de Macîde Emîne ra pers kerd, no cewab girewt:

VENGDAYÎŞ Bİ SAZGEHANÊ MÎYANNETEWEYÎ

''Rojane bi 5 trakoteran çop yeno eştene. Hûmara traktoran seba pakkerdişê kampe bes nîya. Seba ke şarê kampe na babetede zêde baldar nîyo, na perse dewam kena. Goş nêna ra pakkerdişî ser. Ma na babete de zehmetîye ancênê.” Kampa Holî de tim bi tanqan cayanê dûran ra awe yenê. Nê demanê peyênan de Hecînî de werdxaneyêk ame viraştene. Nê werdxaneyî de seba bextwaştoxan ê neweyîyan ke ameyî werd yeno viraştene. No werdxane seba 51 hezar bextwaştoxan bes nîyo. Roje de 600 metrekûp awe yena kamp, awe seba şimitişî û hewcedarîye cîya yena qamp, rojane her kesêk 15 lître kewena, la na zî bes nîya. Nika ver bi hamnanî şonê. Ganî sazgehê hetkarîye na babete de hetkarîye bikerê.’’

Macîde Emîne peynîya qiseykerdişê xo de vengdayîş bi sazgehanê mîyanneteweyîye kerd û vat, “Merdimê tîyayî verê şertanê giranan ra remayî û bîyî bextwaştoxî. Ma Rayberîya demokratîke ya xoserê wazenê baştir bikerê la hêzê ma nêşono ci. Sazgehanê hetkarîye ganî zêdetir paşt bidê ma.”